WILLEMSTAD – E apertura di e di sinku edishon di Curaçao Pride a tuma lugá ayera den sentro di siudat. Aproksimadamente 500 persona a partisipá den e parada kolorido, kual a kuminsá na Riffort, subi brùg di ponton Emma i finalisá na parke Wilhelmina. E apertura i selebrashonnan di siman di ‘Pride’, a keda ofisialmente habrí pa Eugene Rhuggenaath, promé minister di Kòrsou.
Aunke e selebrashon di e siman di ‘Pride’ no ta nada nobo pa nos komunidat, tòg e edishon akí a konfrontá kontroversia, partikularmente ora parlamentario Marilyn Moses a deklará den prensa ku e no ta mira e motibu pa un marcha di ‘Pride’, ya ku Kòrsou ta un komunidat tolerante.
Outor Deya Mensche
“Seksualidat ta un tópiko ku normalmente ta keda trata den tur privasidat, i mirando e kontroversia ku a surgi rònt di e tópiko akí, evidentemente nos komunidat no ta kla ainda pa hiba un debate sano riba esaki”, Moses a deklará durante un kòmbersashon telefóniko. Tambe Moses ta lamenta ku a saka su deklarashonnan fo’i konteksto i a determina eróneamente ku e ta kontra e homoseksual. “Esei sigur no ta e kaso, i loke mi kièr a logra ta pa aktivá e diskushon i sòru ku nos patrimonionan nashon keda respeta”, Moses a splika.
Selebrashon kultural
“Nònsèns”, Mario Kleinmoedig, fundadó i bosero di FOKO – Fundashon Orguyo Kòrsou – a deklará. “Nos tin añanan ta selebrá siman di ‘Pride’ fin di sèptèmber. Ta siman di kultura i turismo a skùif bini riba nos fecha, pues no tabata e intenshon di e organisashon pa tapa niun selebrashon kultural”, el a splika. “Apesar, nos tambe ta forma partí di e komunidat akí i e selebrashon por ta sumamente lukrativo pa nos turismo i ekonomia”, Kleinmoedig a kontinuá.
Ret Karibense a kana den siudat i a papia ku vários persona kende a ekspresá nan punto di bista. Según señora Noraline, kende tabata den Punda pa selebrá un aktividat kultural organisá pa SOAW, ta lamentabel ku kultura no a resaltá mas. “Mester wak e fechanan bon i distinguí e kosnan fo’i otro. Maske mi no ta di akuerdo kon e kosnan a bai, tin un ambiente agradabel den siudat sí”, el a konkluí.
Peper Katana, drag queen
Den Columbusstraat tambe tabatin vários aktividat kultural, unda a topa un multitut di hende ku a selebrá tur dos evento. Selwin a splika kon el a kuminsá ku e selebrashonnan di ‘Pride’ na Riffort i a sigui den Punda ku esnan di siman di kultura. “Mester propaganda nos kultura mas, ku baile i ambiente! Asina nos por selebrá dos kos huntu sin problema”, su amiga Jennifer a splika. Según Farah, tur dos opinion mester keda respetá, paso na final ta e hende ta importante. “Mane’ Rhuggenaath a indiká, ta un bon oportunidat pa mustra un mihó ehèmpel”, el a splika.
Hende dinámiko
Según e famoso reina di drag, Peper Katana, Kòrsou ta birando mas inklusivo, i e krítikonan no prevení esaki. “Un i tur ta bon biní pa forma partí di e festividatnan”, el a deklará. “Tin un grupo di hende dinámiko ku a uni i trese algu bunita dilanti. Fo’i 2002 nos ta organisando ‘Get Wet Weekend’ ku a bira ‘Pride Week’, pues nos tin kasi 15 aña ta organisá riba e fecha akí”, el a konkluí.
