WILLEMSTAD – A yega di akusá Emsley Tromp, kende ta presidente di Banko Sentral di Kòrsou i Sint Maarten (CBCS) for di 1991, mas biaha den su karera. Pero mañan sí e mester defendé su mes berdaderamente, dilanti di hues. Ta bisa ku el a kanalisá sèn pa fondonan di penshun privá.
Ministerio Públiko (OM) ta kalkulá e ‘daño’ pa Kòrsou na 5.5 mion florin. Mañan, den sala di korte na Willemstad, lo bai den e kontenido di e kaso kontra Tromp, ku a haña e nòmber Safiro.
‘Inspirá dor di Hulanda’
Na ougùstùs aña pasá Tromp a pone su funshon abou, temporalmente. Entretantu Konseho di Minister a inisiá e proseso di retiro. Segun Tromp ta trata di un persikushon polítiko, inspirá dor di Hulanda. Su abogado Niels van der Laan ta suprayá ku aki ta trata di un ‘proseso polítiko di podernan mas haltu.’
E Team Bestrijding Ondermijning (TBO), pa kua Hulanda a pone 22 mion disponibel, a hasi e investigashon Safiro. TBO ta investigá e interkonekshon entre baho mundo i e sirkuito legal na Kòrsou i Sint Maarten.
Van der Laan a pidi hues Tjarda van der Spoel pa deklará OM no-admisibel, pero e hues a opta pa mas investigashon.
Financieele Dagblad
Tromp a bin den lus negativo den verano di 2016 kaba, despues di publikashonnan den Financieele Dagblad (FD). A pèrmití e korant wak den un dokumento sekreto di e Nederlandse Bank. Lo a resultá ku a pluma e kompania di seguro Ennia mientras Banko Sentral, e tempu ei bou di mando di Tromp, a sinta mira. Tromp mes tambe lo a hasi kosnan straño ku gastunan personal, segun e korant. Tromp a yama esaki un kampaña di difamashon kontra su persona, durante un rueda di prensa speshalmente yamá. “Mi no ta komprondé kon un korant asina ta publiká kosnan faktualmente eróneo, ku pa kolmo ta fásil pa refutá”, Tromp a deklará e dia ei.
Djarason a tene redada un biaha mas na Ennia en konekshon ku e kaso Safiro. Den un komunikado pa prensa kòrtiku e kompania a partisipá ku ta trata di ‘un kaso kontra di un eks-kliente di Ennia, kende ta sospechoso den un kaso penal’. E kompania ta enfatisá ku ‘ni Ennia ni un di su empleadonan ta sospechoso den e kaso akí’. OM ta konfirmá esei.
Rapòrt PWC
Den e parti final di 2014 a publiká un rapòrt di PWC Hulanda tokante e funshonamentu di CBCS. Den dje tabatin pará, entre otro, ku Tromp sa trèk e tomo di desishon muchu na su mes, ku e poder ta konsentrá rondó di dje’.
Promé ku e publikashon den FD tabatin informenan tokante e finansas privá di Tromp kaba den medionan lokal. Lo a otorgá un fiansa di 3 mion florin sin bòrg na un negoshi di paña di su frei di e tempu ei. Un parti di esaki, 400.000 dòler, lo a pasa pa su propio fondo pa penshun.
Investigashon di integridat
Reakshonando riba esaki, e ministernan di Finansa di Kòrsou, José Jardim i esun di Sint Maarten, Richard Gibson, a eksiguí pa e Servisio di Seguridat Nashonal investigá e integridat di Tromp. T’ asina ku Kòrsou i Sint Maarten ta huntu den un union monetario ku un solo Banko Sentral, ku tin su ofisina prinsipal na Willemstad. Tweede Kamer tambe a hasi pregunta i lo sigui e kaso probablemente ku hopi atenshon mañan.
