KRALENDIJK – Representante di Reino Gilbert Isabella ainda ta rei ta pakiko e mester a sali promé ku ora. Durante su vakashon na Hulanda riba 23 di ougùstùs el a tende ku minister demishonario Ronald Plasterk di relashonnan den Reino a disidí ku e por a bai, na mitar di su término di seis aña.
“Hasi e pregunta di konsenshi ei un bia mas na señor Plasterk, pakiko el a hasi esaki. Mi tin masha gana di sa su kontesta.”
Isabella sa ku den Tweede Kamer a papia tokante abreviashon di e término di e Representante di Reino, pero ainda no a adaptá e Lei Entidatnan Públiko Boneiru, Sint Eustatius i Saba (WOLBES): “Ora mi a drenta den funshon a bisa: ta nombra bo normalmente a base di e lei aktual.”
‘No tin kambio’
Na 2016 ainda gabinete a bisa ku por lo pronto lo no bini kambio institutional. “Esaki ta konta tambe pa e término di nombramentu di e Representante di Reino. A papia tokante esaki detayadamente den Tweede i Eerste Kamer. Esakinan no a bisa nada tokante esaki.”
Isabella ta bisa tambe ku nunka e no a haña un kombersashon tokante su funshonamentu ku Plasterk òf ku e sekretario general di e ministerio di Asuntunan Interior i Relashonnan den Reino. “Kòmplimènt si mi a haña”. Pero, Isabella ta atmití, ta minister ta disidí tokante nombramentu i retiru. “Aparentemente ta esaki e ker a hasi.”
E resepshon di despedida pa Gilbert Isabella tabata bon bishitá. Potrèt: Gijs van den Heuvel
Ta Tweede Kamer a rekordá Plasterk, na kende Isabella a referí djarason den su spich di despedida na Boneiru komo ‘e minister demishonario ei’, na e palabrashon di 2014 pa hasi e término di e Representante di Reino mas kòrtiku, i el a intervení. Den su spich Isabella tampoko no a keda sin menta ku gustosamente e lo ker a kompletá su término. Algu ku te aworakí niun Representante di Reino no a logra.
Papel di konsehero
Tokante e kontenido di e funshon Isabella ta bisa ku e tabatin falta di outorisashon. E Representante di Reino ta representá gobièrnu, ‘un puesto avansá di gabinete’, pero segun e, e mester defendé e interesnan di e islanan tambe na Den Haag. Esei ta trabahoso: “Bo tin solamente un papel di konsehero di e minister.”
“E Representante di Reino tin falta di outorisashon. Bo papel ta solamente di konsehero”
Gilbert Isabella dilanti di e ofisina di RCN. Potrèt Gijs van den Heuvel
Si e funshon di Representante di Reino keda eksistí pa Boneiru, Sint Eustatius i Saba, algu ku Isabella ta simpatisadó di dje, mester fortifik’é: “Si bo mira ku kosnan no ta bai manera nan lo mester a bai (na e islanan red.), e lo mester por duna un instrukshon gubernamental. I mi ta un simpatisadó grandi di introdukshon di e deber di konseho pa ministerionan, pa asina no por bai propósito pa e islanan sin ku e Representante di Reino a duna su opinion.
For di Hulanda Isabella ta keda aktivo komo Representante di Reino te 31 di desèmber. Despues e direktor di Rijksdienst Caribisch Nederland (RCN), Jan Helmond, ta remplasá e funshon te ora nombra un susesor.
