WILLEMSTAD – Krus Kòrá na Kòrsou a traha lugá pa 500 refugiado venesolano. pasobra e situashon krítiko ta birando pió na Venezuela, Krus Kòrá ta preparando pa un plan di krísis pa refugiado. Djabièrnè pasá mes Wardakosta a detené binti venesolano indokumentá na Kòrsou.
“Nos a kumpra tènt i nos por akomodá 500 persona den shen tènt di sinku persona”, Hendrik Stomp di Krus Kòrá Kòrsou ta konfirmá. Segun Stomp nan por garantisá ayudo pa shete dia, maske ku ta ku boluntario nan ta traha. Ayudo for di Hulanda ta deseabel, pero Hulanda ta eksihí komo kondishon ku Kòrsou ta firma e Tratado di Refugiado di 1951.
Un reportahe di Deya Mensche
Te awor gobièrnu di Kòrsou a indiká ku e no por firma e tratado pa motibunan ekonómiko i finansiero. Formalmente e isla a tuma responsabilidat polítiko si: ántes no tabatin ni maneho ni prosedura pa refugiado”, promé minister Eugène Rhuggenaath ta deklará.
“Nos mester mira kon leu nos por kumpli ku e tratado pa nos por firm’é.” E promé minister ta enfatisá ku e Taskforce Venesuela ku a instalá ta dirigí su mes espesialmente na deskurashamentu di refugiado pa bini Kòrsou.
Potrèt: Wardakosta Área Karibense
Posishon difísil
Segun VENEX, e asosiashon na interes di venesolano na Kòrsou, e aviso ku nan a duna gobiernu na 2014 a sali. E asosiashon ta haña ku Hulanda ta pone Kòrsou den un posishon difísil, pasobra e no tin sufisiente moda pa tuma un ola di refugiado. “Nos ke yuda, pero nunka outoridatnan no a invitá nos. Miéntras ku komo venesolano nos konosé sierto situashon mas mihó”, Carlos Rivas di VENEX ta bisa.
Minister Girigorie ta bisa ku el a tene diferente kòmbersashon ku e organisashon, pero e ta enfatisá ku nan persona di kontakto ofishal ta kònsel venesolano.
Medida
Sèptèmber último Estádos Unídos i Canada a anunsiá e introdukshon di Medida Ekonómiko Spesial pa Venesuela. Hulanda ta kontemplá pa huntu ku Union Oropeo tambe tuma medida kontra Venesuela. Outoridatnan venesolano ta sigui ninga ku tin un krísis humanitario, i p’esei Reino Hulandes no por duna ayudo na eskala grandi.
Segun e mandatarionan hulandes e partinan karibense di Reino a kuminsá ku introdukshon di e plan operashonal di krísis kaba, kaminda organisashonnan internashonal manera Krus Kòrá, UNHCR i OIM ta duna nan sosten. Minister Girigorie ta konfirmá ku e tim di krísis lokal ta tene promé minister Rhuggenaath i e mes na altura diariamente.
No por konfia e sifranan
Minister Girigorie no por indiká eksaktamente kuantu venesolano indokumentá tin na Kòrsou. “Tur sifra ku menta ta spekulativo.” Girigorie ta ninga tambe ku venesolano detené ta keda den prizòn lunanan largu, si nan no por paga e biahe pa bai nan pais bèk. “E promedio ta sinku dia pa hende muhé i entre shete pa dies dia pa hende hòmber”, segun e minister.
Tambe a instalá un komishon ku ta atendé e kuido di refugiado detené. “Nos ta respetá derecho humano i tin un mekanismo di kòntròl fuerte.
