DEN HAAG – Mester pronunsiá un sentensia entremedio den e kaso kontra e dos polisnan ku tabata envolví den e aresto di Mitch Henriquez. Un investigashon nobo independiente ta revelá kos den e investigashon di polis.
Asina Gerald Roethof, abogado di e famianan di e arubano di 42 aña ku a fayesé despues di su detenshon, ta bisa e wikènt aki den su karta na Ministerio Públiko.
Ku e eksigensia aki Roethof ta reakshoná riba e ponensianan di tres katedrátiko di medisina di intensive care djasabra atardi den e programa di radio Argos. E tres sientífikonan a konkluí ku Henriquez no a fayesé di e ‘síndrome di strès agudo’.
Segun spesialistanan den e kaso di korte kontra dos polis, ta eksaktamente e strès despues di violensia di polis i un lucha durante e aresto a kousa morto di Henriquez.
E katedrátikonan ta haña esaki ko’i kèns. Segun nan strès ta eksistí si, ma e no por mata bo: ‘strès por ta un fenómeno adishonal pero nunka no e kousa prinsipal’.
Still di un di e vidionan ku a saka di e aresto di Henriquez, ku nan ta hinka den e bùs miéntras ku e ta for di tinu.
Kla kla
E konklushonnan di e investigashon independiente aki ta kla kla, Roethof ta bisa. E ta di opinion ku e investigashon ta kontené informashon independiente nobo. Roethof ke pa Ministerio Públiko pone e wes duna un sentensia entremedio.
OM no a reakshoná ainda riba e alegashonnan di e katedrátikonan. “OM òf korte mester hiba e investigashon di e katedrátikonan den e kaso kontra esnan envolví”, Roethof ta enfatisá. E investigashon no tabata kompleto.”
Movement X
E famianan ta sinti nan mes sostené pa un demonstrashon ku a tene ayera na Den Haag. Nan a partisipá na un marcha di protesta kontra violensia di polis, ku spanduk ku teksto manera ‘Stòp violensia di polis’ i ‘Stòp rasismo’. A a tene e demonstrashon riba inisiativa di Movement X, un grupo di akshon ku ta protestá kontra violensia di polis i profilashon étniko.
E shen i piku partisipantenan a kana di Centraal Station na Den Haag pa Vredespaleis i bèk. Na kaminda a pone un krans na warda grandi di polis.
Segun Roethof e famianan di Henriquez a eksperensiá e demonstrashon kontra violensia di polis komo sosten i kompashon. “Ta importante pa keda mantené atenshon pa e morto teribel di Henriquez. No por tapa e kaso aki.”
| Na yüni e turista arubano Mitch Henriquez a fayesé despues di un enkuentro violente ku polis. Di e sinku polisnan envolví den su aresto ta pèrsiguí dos. Na novèmber fiskal a laga sa ku no ta pidi kastigu. Segun OM a kastigá e polisnan kaba ku e impakto grandi di e kaso i nan dunadó di trabou tambe a skual nan. |