Portrèt: Fundacion Zinnia

ORANJESTAD – Korte Komun di Aruba djaluna tras di porta será a skucha e polis ku na 2015 a kore ku outo mata e mucha muhé di 12 aña Zinnia Croes. Esaki despues ku e mayornan a entregá un keho kontra Ministerio Públiko (OM) di Aruba. OM anteriormente e aña aki a disidí pa no persiguí, pa motibu di eror den e investigashon di indisio.

Sven Faarup, abogado di e famia di Zinnia, ta bisa ku den e seshon será e polis a deklará ku el a bebe alkohòl promé ku el a drenta den su outo. Segun e, Zinnia a bula dilanti su outo ònferwagt i e no por a brek mas. Durante un investigashon despues di e aksidente e polis tabatin un porsentahe muchu haltu di alkohòl den su sanger.

Bosero di OM Ann Angela: “A base di e keho di e mayornan Korte a disidí pa nan mes tende e polis. A base di e seshon ei nan ta tuma un desishon tokante persekushon.

Si Korte disidí ku ta hustu ku OM no a persiguí, e opshonnan pa persiguí e polis penalmente lo kaba. Úniko kos ku e mayornan Michella Matos i Gilbert Croes por hasi e ora ei ainda ta kuminsá un kaso sivil kontra e polis. Si Korte disidí ku mester persiguí e polis, Korte por fòrsa OM pa hasi esaki.

Nan abogado a konsehá e mayornan pa no bisa nada tokante di e seshon. “Nos a tene e asuntu mas ketu posibel pa laga tur kos kana mas nechi posibel”, mama Michella ta bisa.

Erornan grandi
Pa motibu di erornan grandi den e promé investigashon di indisio i e rapòrt di tráfiko OM na Aruba a disidí di no persiguí, ni sikiera pa stürmentu di un outo bou di influensha di alkohòl. No ta un spesialista di tráfiko a traha i firma e rapòrt i ta suponé ku a midi e marka di brek robes. P’esei no por determiná mas si e outomobilista por a prevení e aksidente i kon duru e tabata kore.

Mama Michelle Matos (meimei). Potrèt Ariën Rasmijn

Zinnia su mayornan nunka no a risibí un deklarashon por eskrito di OM, algu ku kua nan por a apelá. Esaki a sosodé numa ora ku nan a buska publisidat. Nan ta di opinion ku ta pa malu a kometé eror i ku tabatin kuestion di hustisia di klase.

Fundashon
E mayornan a lanta un fundashon na honor di nan yu muhé, ‘Fundacion Zinnia’. Nan ke deskurashá hende pa stür ora nan a bebe alkohòl. Nan ta hasi esaki ku bòrchi i spòt di propaganda i introdukshon di ‘Amigu/amiga Didi’, e amigu òf amiga ku ta keda sin bebe ora di sali, pa e por stür outo.

Korte komun ta divulgá nan desishon dia 19 di yanüari.