Pòrtrèt: Ariën Rasmijn

ORANJESTAD – Gobièrnu arubano ta prekupá pa e menasa di e presidente venesolano Nicolás Maduro pa para tur tráfiko komersial entre su pais i islanan ABC. Promé minister Evelyn Wever-Croes ta rekonosé ku e motibu pa e menasa, esta negoshi di kontrabanda, ta e problema.

Wever-Croes ta bisa ku el a tuma kontakto direkto ku Ministerio di Asuntunan Eksterior hulandes, komo ku relashonnan ku eksterior di Aruba ta un asuntu di Reino. A palabrá ku huntu lo sigui e desaroyonan ku hopi atenshon. Un paro di eksportashon pa Aruba lo toka e isla, e promé minister ta bisa.

Djárason Maduro a bisa na televishon nashonal ku el a kontemplá seriamente di para tráfiko komersial ku e islanan ABC. Motibu pa esaki ta e ‘kontrabanda di produkto di e pais pa mafia na e islanan’. E skarsedat agudo aktual na Venezuela lo ta un konsekuensha direkto di esaki. Tambe Maduro a anunsiá di a ‘planea un sorpresa chikí’ pa e islanan. No ta kla ta kiko e ke men ku esei.

Kontrabanda
Wever-Croes ta haña ku e iritashon di Maduro ta klòp si. “Nos tambe ta haña ku mester trata kontrabanda. Nos no por hasi manera e no ta sosodé.” Último añanan banda di kontrabanda di gasolin na gran eskala, trafikashon di hende, kontrabanda di arma i di droga for di Venezuela a oumentá hopi.

Segun e promé minister awor ta importante pa gobièrnu di Aruba pa oumentá e protekshon di e fronteranan na kosta. E ta bisa ku na nivel atministrativo a komuniká ku e kònsel venezolano na Aruba ku Aruba lo baha mas fuerte riba kontrabanda pa i for di e pais bisiña.

“Tur tienda i supermerkado na Aruba lo a sinti e konsekuenshanan mésora”

Fruteria
Yadira Acosta ta manehá un di e hopi fruterianan chikí na Aruba kaminda ta bende berdura, fruta i hopi sorto di keshi. Espesialmente e produktonan fresku ku e ta bende ta bini tur siman for di Venezuela via barku ku ta mara den haf di Barcadera. “Nos produktonan fresku ta bini djei pasobra e distansha ta mas kòrtiku” segun Acosta. Sobrá ta bini di Colombia.

Acosta ta bisa ku si tur e tráfiko for di Venezuela para di bèrdat, no ta tienda manera di dje so lo sufri. “Tur pakus i supermerkado lo sinti e konsekuenshanan mésora.”

Keshi venesolano ta masha popular na e islanan

Mester papia
Segun Acosta no ta promé bia ku Maduro ta ekspresá su mes. Algun aña pasá pa un temporada kòrtiku a limitá e suministro di bèrdura i fruta. A pone kuota riba sierto produkto. Esaki a kousa rèki bashí den supermerkadonan arubano, ku mester a desviá pa suministradó na Repúblika Dominikano. “Mi no ta kere ku esaki lo sosodé atrobe dje lihé ei” Acosta ta haña. “Pero mi ta haña si ku gobièrnu arubano mester papia ku esun di Venezuela.