HILVERSUM/ROTTERDAM – “Mi mayornan no ke pa mi usa píldora antikonseptivo pasobra nan tin miedu ku mi lo bai tin sèks.” Kylie (17) tin un frei, pero na kas su hendenan no ke papia tokante esaki abiertamente.
For di un investigashon nashonal resien di Rutgers i Soa Aids Nederland ta sali ku entre otro hóben di desendensha antiano ta papia ménos ku nan mayornan tokante sèks ku otro hóben. Ku tur konsekuensha: hóben antiano mas tantu tin (mal) eksperensia ku sexting i mucha muhé antiano mas tantu ta haña nan ku pasamentu di límite den kondukta seksual i embaraso no deseá.
“Mi no por usa pildorá antikonseptivo pasobra nan tin miedu ku mi lo bai tin sèks”
Espesialmente e tópiko di antikonsepshon pa algun mayor antiano parse ta un problema. “Nan ta rabia ora mi kuminsá papia di esaki”, Kylie ta bisa. “Mi no por usa píldora antikonseptivo pasobra nan tin miedu ku e ora ei mi ta bai tin sèks ku mi frei. Hopi straño si. Ta trata mucha muhé hopi diferente for di mucha hòmber.”
No ta mayornan so tin un moral dòbel, mucha hòmber di desendensia antiano tambe. Asina a sali for di e investigashon di Rutgers i Soa Aids Nederland ku espesialmente mucha hòmber di desendensha antiano ta desaprobá hopi partner seksual pa mucha muhé mas tantu ku hopi partner seksual pa mucha hòmber.
“Tur hende ta hasié pero papia abiertamente si nos ta haña difísil ainda”
E trahadó ku hóben i sikólogo kurasoleño Quinlan de Windt di Rotterdam ta yama e aktitut di komunidat antiano, ora ta trata di sèks, ‘dòbel i de bes en kuando asta hipókrita’. Sèks literalmente i figurá ta opviamente presente durante fiesta, karnaval, tur hende ta hasié, pero pa papia di dje abiertamente esei si nos ta haña difísil ainda.”
Konsekuenshanan negativo
E konsekuenshanan negativo di esaki Quinlan ta mira tur dia, espesialmente serka famianan problemátiko antiano. Embaraso di tiner hopi bia ta bai di un generashon pa otro i ku esaki tambe e retraso i vulnerabilidat di nos hóbennan, espesialmente den e desaroyo sosial-emoshonal. Esei ta piká pasobra ku un kombersashon simpel pero konfrontante i bon guia por evitá esaki. Mayornan simplemente debe esaki na futuro di nan yunan.