Portrèt: Fundacion Zinnia

ORANJESTAD – Korte Komun di Hustisia a duna Ministerio Públiko òrdu pa pèrsiguí e polis ku na 2015 a trapa Zinnia di 12 aña ku outo mat’é. Ayera Korte a anunsiá su desishon, despues ku nan a tende e polis na desèmber.

OM anteriormente e aña aki a disidí pa no pèrsiguí pasobra a kometé eror den e promé investigashon. P’esei e mayornan di Zinnia a duna keho na korte.

Alkohòl
E keho a yega na un seshon di korte, kaminda tras di porta será a tende e polis femenino. Durante e seshon el a atmití ku e tabata bou di influensha di alkohòl ora e aksidente a sosodé.

El a mira Zinnia numa despues ku ‘el a bula dilanti di e outo’. Segun su abogado e fail lo tabatin muchu poko punto di referensha pa persekushon i ‘e kondukta di e polis lo no a kousa e aksidente’.

Abogado Sven Faarup entre e mayornan di Zinnia Croes. Potrèt Ariën Rasmijn

Segun Korte den e fail sigur tin indikashon di kondukta reprochabel. Ta referí na e deklarashon di e polis na desèmber. Pa motibu di esaki e ta potenshalmente kastigabel i e keho ku e mayornan a entregá ta fundá. Kontra prensa lokal e bosero di OM a konfirmá ku nan lo aktua segun òrdu di Korte.

Tata Gilbert Croes ta bisa ku e ta kontentu ku e wisio di Korte. “Awor Zinnia ta haña un chèns dilanti wes.” E ta spera ku lo sali un kondena.

Eror grandi
Na 2015 un outo a dal Zinnia Croes ku un polis femenino na stür. E tabata kore mas o ménos 80 kilometer pa ora den un área edifiká i e tabatin seis mucha den su outo. Pa motibu di erornan grandi ku a kometé den e promé investigashon i e rapòrt di tráfiko OM na Aruba lo a disidí di no persiguí, ni sikiera pa stürmentu bou di influensha di alkohòl. Zinnia su mayornan nunka no a risibí un deklarashon por eskrito di OM, algu ku nan por a usa pa apelá. Esaki a sosodé te ora ku nan a buska publisidat. Nan ta di opinion ku ta intenshonalmente a kometé eror i ku ta trata di hustisia di klase.