Portrèt: PdVSA

KRALENDIJK – E kompania pa abastesementu di zeta Bonaire Petroleum Company (Bopec) no mester sera porta mesora, pero temporalmente su operashon lo ta na un nivel abou. E Inspektorado pa Ambiente di Bibienda i Transporte (‘ILT’) a pone e kompania bou di supervishon mas severo. Seramentu ta keda posibel ‘si e situashon pidi p’esei’ òf si tin peliger agudo.

ILT i Rijkswaterstaat (RWS) a hasi un ‘bishita di verifikashon’ na Bopec siman pasá. ILT a inspektá e tanki- i tuberianan, RWS a inspektá e stèlagenan. Bopec a logra demonstrá tambe ku e tin sufisiente sèn pa atendé e mantenshon di mas importante, ku ta atrasá, rapidamente. Luna pasá a entregá un plan p’esaki i Bopec a kuminsá kaba ku reparashon di ‘e defektonan di mas urgente’.

Inspekshonnan
Lo hasi multiple inspekshon bou di e supervishon mas severo pa vigilá un ke otro. ILT i RWS ke ta sigur di ku ta hasi mantenshon ‘na un manera korekto i sigur’.

‘Mantené preshon haltu’
Tin diferente multa kologando riba kabes di Bopec, pa asina tene ‘e preshon haltu’ pa e trabounan di reparashon mas urgente. Lo mester paralisá e terminal temporalmente tambe, ora di hasi mantenshon grandi.

ILT i RWS a pone un ultimatum pasobra e situashon tabata insigur pa hende i pa medio-ambiente. Pa falta di sèn serka e propietario PdVSA, kasi no a hasi mantenshon na tanki, tuberia, installashonnan eléktriko i stèlage.

Menasá ku seramentu
P’e motibu ei lèkage i situashonnan insigur a aparesé. ILT a menasá di sera e empresa, ku ta suministrá gasoil pa e sentral di elektrisidat na Boneiru, si no tabatin un plan pa finansiamentu riba mesa riba 5 di yanüari (despues a alargá e periodo te ku 19 di yanüari).

Multanan
Despues di a studia e pasonan ku e empresa ke tuma pa mehorá e siguridat, a remplasá e preshon gubernamental (ku ta nifiká seramentu) ku e multanan. Lo mester paga esakinan si Bopec no ehekutá e trabounan di reparashon ‘di mas urgente i nesesario’ bon òf si konstatá infrakshonnan nobo. Ainda lo por apliká preshon gubernamental despues.