Pòrtrèt: Ministerio Públiko

WILLEMSTAD – “Nos ta aktua pisá kontra arma di kandela”, Roger Bos ta bisa. Mitar aña pasá el a kuminsá traha komo prokuradó general (PG) pa Kòrsou, Sint Maarten i e islanan BES (Boneiru, Sint Eustatius i Saba).

“Den e lucha kontra e entrada di armanan pisá, nos ta buska kolaborashon ku e servisio di imigrashon, duana, marechaussee, wardakosta i marina real. Nos ta bini huntu riba un base regular. Nos ke stimulá esei pasobra e ta mas efektivo pa huntu nos propiná un klap kordiná.”

Kontrabanda for di Venezuela
No ta trata di solamente arma, Bos ta splika. “Hopi biaha un parti di eseinan ta bini ku e barkunan di fruta for di Venezuela, pero e ora ei no ta solamente arma tin na bordo: tambe muhé ku ta abusá di dje den prostitushon aki i hopi biaha tin droga tambe. Detekshon di e kargamentunan kombiná ei ta un di e problemanan grandi ku nos ta atendé.”

Bos ta enfatisá: “Tin kantidatnan grandi di arma ta drenta. E biahanan ku nos a kue nan, nos a mira kiko tin na bordo. Bo por konfiská 200 arma pero si den e siguiente barku tin 40 arma – òf mas – ta drenta den un tiru, bo no ta solushoná e problema.”

Bon organisá
“Ta trayektonan di kua nos tin sigur ku tin hende na Kòrsou metí den e organisashon”, Bos ta remarká di e kontrabanda via barku di fruta. “Ora un barku asina yega, mester risibí e kargamentu i tin un trùk di karga ku mester hiba e kargamentu un kaminda. Pues tin un organisashon i tin sierto hende ku ta bai dilanti, pues ku ta haña sèn i ku tin probecho, ora hende bini akibanda ku arma òf droga for di Venezuela.”

‘Nos sa ku tin hopi Venezolano na Kòrsou i ku, lastimamente, nos no por kue tur kos’ – Bos

“Nos no ta mira niun man di gobièrnu na Venezuela ta yuda prevení ku ta embarká e kargamentunan ei”, Bos ta bisa. “Pero nos no ta mira tampoko ku ta animá pa kosnan bin den nos direkshon. Tin historia asina ta sirkulá, pero nan no ta kuadra ku realidat.”

Labamentu di plaka?
Aki ta laba plaka ganá ku kontrabanda tambe? “Nos ta den full swing ku ofisinanan ku ta duna servisio finansiero-atministrativo pa limitá labamentu di plaka kriminal. Nos no tin e ilushon ku e ora ei no por laba plaka mas aki, pues, e ta sosodé.”

“Nos ta hiba e diálogo ku tur hende den e sektor finansiero, pero sigur nos tin mester di mas hende pa nos Financial Investigation Unit”, e PG ta atmití.

Kasonan hudisial grandi

Un kantidat di kaso hudisial grandi a dominá notisia e último añanan. Manera e kaso Máximus, ku ta e investigashon pa yega na e outornan intelektual di, o sea, esnan ku a duna òrdu pa, e asesinato riba e polítiko Helmin Wiels den 2013. A tira Wiels mata ku un di e armanan kontrabandiá ei.

“Pèrsekushon di outornan intelektual ta inmensamente kompliká. Mayoria biaha nos no ta alkansá pa hasi esei na Hulanda. Ta masha poko biaha esei sa sosodé”, segu Bos.

Proseso kontra Emsley Tromp
E PG ta hopi desapuntá ku e veredikto den e kaso di froude mionario kontra e eks-presidente di Banko Sentral Emsley Tromp – otro di e kasonan ku a hala hopi atenshon. El a pone su speransa den e apelashon.