WILLEMSTAD – Un biaha mas un hulandes europeo a bira prokuradó general (PG) pa e sinku islanan Kòrsou, Sint Maarten i BES (Boneiru, Sint Eustatius i Saba). No mester wak lokalmente si tin un hende adekuá pa e funshon akí?
“Ora di skohe un PG kapasidat i kualidades ta na promé lugá”, PG Roger Bos – kende a tuma e batuta over di Guus Schram mitar aña pasá – ta kontestá. “Tabatin mas kandidato pa e funshon akí, tambe karibeño, pero no tabata wak si ta un antiano, kurasoleño òf hulandes europeo.” Tòg Bos ta bisa: “Ami ta hopi mas independiente ku un hende ku ta bira PG ku su 55 aña di edat i ku a forma relashonnan henter su bida aki.”
“Relashonnan den bario, na trabou i for di skol por stroba si bo tin ku detené un hende ku kisas tabata hopi yegá n’ abo”, e ta añadí.
Forma hende lokal
Por sierto, ta trahando riba formashon di hende lokal pa e funshonnan mas haltu, Bos ta bisa: “tin un sekretario ku ta birando fiskal i nos ta guiando un fiskal den e trayekto pa e funshon di fiskal mayó. E hendenan mester haña un chèns i nan mester hasi uso di esei, pero kapasidat tambe ta konta.”
Region muchu chikí
Dikon no ta opta pa un PG apart pa Kòrsou, pa Sint Maarten i pa e islanan BES? “Personalmente mi ta kere ku e region aki ta muchu chikitu pa diferente PG. Simplemente lo no ta práktiko. Lo bo haña masha hopi hende ku ta hefe un kaminda pero ku kisas nèt no ta hasi e trabou bèrdaderamente. Mi tin un fiskal mayó aki na Kòrsou ku ken mi ta sinkronisá trabounan i nos ta sinkronisá ku e fiskalnan mayó di Boneiru i di Sint Maarten.”
“PG apart pa kada isla lo stroba e kolaborashon, ku eksplisitamente nos ta boga p’e, mas ku e ta fasilit’é.” – Bos
“Un ehèmpel: a pidi e fiskal mayó di Boneiru pa un plan di akshon pa prevenshon den kaso manera ku orkan Irma. Den esei a deskribí, entre otro, kon nos lo por digitalisá nos trabou. Awor no ta Kòrsou, Sint Maarten i e islanan BES so ta bai implementá e plan ei: Aruba tambe a indiká di ta bai traha ku e plan ei. Asina tur dossier lo ta digital, akiratu: bo no ta logra algu asina si tin kuater PG.”
Inkluso Aruba
“A base di e kolaborashon ei, tur parkèt – inkluso esun di Aruba – i tambe tur korte ta bai traha huntu awor.” For di 1986, ora Aruba a haña su statùs aparte, e isla tin su mes PG. For di 2016 esei ta Alexander van Dam.
“Nos a kaba di haña e evaluashon di e funshonamentu di un solo PG pa tur isla, den 2015 i despues di sinku aña ta evaluá atrobe. E ora ei e paisnan por disidí huntu atrobe ta kon nan ke e aspekto akí.”