Pòrtrèt: Hilbert Haar

PHILIPSBURG – United Democrats – un union entre e partidonan United People’s Party i Democratic Party – a gana elekshon, pero no ku e mayoria aplastante ku e partido a bai p’e. Ku shete asiento UD falta nèt unu pa un mayoria den e Parlamento ku tin djessinku asiento.

Pa di promé biaha St. Maarten Christian Party (SMCP) a logra un asiento i e ta parse e partido indiká pa traha huntu ku UD den un koalishon nobo. E gobièrnu nobo lo mester kuminsá traha na e rekonstrukshon di e isla: Sint Maarten a haña un sla duru di orkan Irma na sèptèmber pasá. Hulanda a apartá 550 mion euro pa e rekonstrukshon.

Theo Heyliger depositando su voto. Portrèt: Hilbert Haar

Enkargo fèrfelu
Theo Heyliger, e líder di UD, a bisa djaluna ku e prioridatnan di mas haltu pa e añanan benidero ta yuda pone e ekonomia kana i bibienda pa e siudadanonan.

Segun Heyliger e elekshonnan akí tabata un enkargo fèrfelu pa tur hende. “Te asta pa ami tabata difísil pa logra haña donashon”, el a indiká.

E partido di eks-presidente Marlin
E gran rival di UD, National Alliance, a presta sorprendentemente bon, despues di tur e krítika ku e eks-presidente William Marlin a haña riba dje despues di orkan Irma. Pero ku sinku asiento ta parse ku e partido ta destiná pa oposishon.

E partido United St. Maarten di e lider polítiko Frans Richardson, ku a rekobrá libertat siman pasá, a entregá un asiento i a keda ku dos. Ta sospech’é di a tuma 370.000 dòler na sèn bou í mesa, kumpra voto durante e elekshonnan di 2016 i kometé froude fiskal.

Frakshon Richardson
Posibelmente Richardson lo sigui komo frakshon huntu ku e direktor interino di e Ofisina di Turismo, Rolando Brison kende ta kuestioná. Brison lo a hunga ku plaka di e kompania di aviashon lokal Winair. Pero pa mesun preis lo por ta huntu ku eks-minister Maria Buncamper-Molanus kende tambe ta kuestioná i ku a risibí sentensia den pasado pa froude fiskal.

Distribushon di karchi pa vota i opservadónan

Asistensha
E asistensha na urna tabata di 62 porshento: algu mas abou ku na e elekshonnan di 2016, ora e asistensha tabata 65 porshento. A antisipá un asistensha mas abou, pasobra hopi hende ta rekuperando ainda di e destrukshon enorme ku orkan Irma a laga atras. Ta resultá ku no ta tur hende a risibí karchi pa vota tampoko, loke a sòru pa bruashon na e urnanan:

Di Laura Bijnsdorp (na ingles)

Opservadónan
E elekshonnan di djaluna – e di tres for di e desmantelashon di Antia Hulandes na 10 di òktober 2010 – a transkurí sin insidente. Riba petishon di e gobièrnu interino di Sint Maarten, tabatin opservadó presente na e elekshonnan. Esakinan tabata e lider di e partido hulandes D66, Alexander Pechtold, e miembro di Eerste Kamer pa SP, Meta Meijer i e representantenan di e Konsehonan Supremo Elektoral di Aruba i di Kòrsou. Opinionnan tabata dividí, enkuanto e presensia di e opservadónan riba e isla:

Di Laura Bijnsdorp (na ingles)