Pòrtrèt: Pixabay

DEN HAAG – Por lo general, polítikonan na Den Haag ta reakshoná di forma positivo riba e resultado di elekshon na Sint Maarten. Segun sekretario di estado Raymond Knops (Relashonnan di Reino) e resultado ta brinda ‘pèrspèktiva pa kolaborashon’. E partido United Democrats (UD) t’esun ku a haña mas asiento durante e elekshonnan di djaluna.

Sint Maarten a bai adelantá pa urna, despues ku a surgi un krisis polítiko bou di eks-premier William Marlin di National Alliance (NA) den e situashon ku a reina despues di orkan Irma.

Faltando un asiento
Preferibelmente UD, e gran rival di Marlin su NA, ker a goberná su so, pero e partido a kai un asiento chikí p’esaki. Awor e partido Sint Maarten Christian Party (SMCP) ta hunga un papel krusial enkuanto kua koalishon lo por forma.

Ku esei no por deskartá e posibilidat ku e partido di Marlin, ku tabata kontra di e kondishonnan hulandes mará na e fondo pa rekonstrukshon di 550 mion euro, por bini bèk.

VVD: ‘resultado remarkabel’
E partido di mas grandi den e koalishon na Hulanda ta kontentu ku e manera ku e elekshonnan a bai, pero ta reakshoná di forma kouteloso riba e resultado. “Ta lástima ku e partidonan no a traha un programa pa bai elekshon kuné.”

SP: ‘mira pa kere’
A base di e resultado di e elekshonnan, no por bisa ku e habitantenan di Sint Maarten a skohe pa ‘un kambio’, SP ta konkluí. “Mi ta mira tambe ku tòg a bolbe skohe algun hende sospechá di froude, evadimentu di impuesto i kumpramentu di voto”, Ronald van Raak ta remarká.

“E kos di mas importante pa e hendenan na Sint Maarten ta, ku e rekonstrukshon por kuminsá realmente. Ku nos ta bai yuda hende. Pone e isla superá esaki. Mi ta spera tambe ku esaki lo logra ku e gobièrnu ku bini awor.”

CDA: ‘bon relashon’
Meskos ku su partner di kualishon VVD, partido CDA tambe ta ‘kontentu’ ku e elekshonnan na Sint Maarten a kana bon. “Mi ta spera ku awor lo forma un gobièrnu stabil masha lihé mes”, Joba van den Berg ta bisa.

Segun Van den Berg CDA ta bai pa mehorá e relashon ku Sint Maarten, pa ‘kos drecha pa e hendenan i pa Hulanda por duna sosten ku konosementu i kapasidat’.

D66: ‘ta duna konfiansa
‘Un formashon di e partidonan ganadó UD i SMCP lo duna e konfiansa pa sigui ku e rekonstrukshon’, e Miembro di Tweede Kamer Antje Diertens ta laga sa. “Nos ta kontentu ku e elekshonnan a bai di un forma stabil.”

GroenLinks: ‘gobièrnu stabil’
“Ta bon ku tabatin elekshon sin insidentenan straño. Asina mester ta den un demokrasia”, Liesbeth van Tongeren ta reakshoná di parti di GroenLinks. E partido ta spera ku ‘pronto lo bini un gobièrnu stabil pa atendé e rekonstrukshon i pa duna e habitantenan un futuro bon’.

PvdA: ‘hasi lihé’
Segun e Miembro di Tweede Kamer pa Partij van de Arbeid (PvdA) Attje Kuiken, e resultado ta duna ‘pèrspèktiva’. “Awor e partidonan tin e responsabilidat pa forma un kabinete stabil i íntegro i pa pone man na obra kuné. Despues di e destrukshon di orkan Irma bo ke ta sigur komo habitante ku lo hasi lihé ku e rekonstrukshon.”