Pòrtrèt: Sharina Henriquez

ORANJESTAD – Awor cu Citgo Aruba a para e rehabilitacion di e refineria na San Nicolas, trahadonan y contratistanan ta mira e futuro cu basta preocupacion.

Na entrada principal di e refineria por ripara cu personal ta preocupa. “E ta hopi keto awor. Tur sa con nos ta para y nan no por mira cu e rehabilitacion lo tin un futuro mas”, asina un supervisor riba contract ta bisa.

“Nos ta cabando e proyecto actual. Esaki lo tuma un par di siman ainda y despues nos ta bay cas. Pa hopi hende e situacion ta fastioso pasobra tur a pensa cu mas proyecto lo a bini. Pero nan a stop. Ami mes ta bay traha bek den construccion.”

‘Hasta bo por bisa cu nan a laba placa akiden’ -contratista Citgo

Un otro contratista ta referi na e inversionnan haci. “Nan a hinca hopi placa akiden caba. Hasta bo por bisa cu nan a laba placa akiden. Pasobra mas leu tin un instalacion completamente nobo pero ainda nan no a uz’e.”

Sin cobransa
E contratistanan specialmente ta mira un futuro scur pasobra nan a keda sin cobra sea Citgo no ta paga nan na ora. Esaki doño di refineria RdA y tambe sindicato IOWUA a confirma. Pa motibo cu nan a firma un acuerdo di secresia cu Cito, nan no por papia. Citgo Aruba mes ya a anuncia cu lo manda mayoria di contratista cas.

Director di RdA Alvin Koolman ta bisa cu mayoria di e companianan di contratistanan lo enfrenta problema. “Ta trata di companianan chikito, nan no por wanta cuater luna sin cobra.”
Minister di Labor, Glenbert Croes a urgi Citgo pa no manda e contratistanan cas. Y pa duna claridad si lo reanuda e rehabilitacion of no.

‘Dentro di tres luna nos mester un solucion’ – presidente di sindicato IOWUA

E trahadonan den servicio di Citgo Aruba tambe ta preocupa. Maske Citgo a priminti di mantene nan den servicio. Hopi trahado ta miembro di e sindicato IOWUA. Presidente Boy Anthony no kier perde speransa. “Pero mi experiencia ta bisa cu dentro di tres luna nos mester un solucion. Si no mi no ta mira cu lo bin un rehabilitacion mas.”

Cuponan di trabou priminti
Companianan di contratista local semper a haci e trabou a base di proyectonan den e refineria. Aña pasa ora a anuncia e rehabilitacion, nan a tuma cientos di hende den servicio. Gobierno anterior cu a cera e deal cu Citgo, a indica cu e rehabilitacion di e refineria lo crea tres pa cinco mil cupo di trabou.

Lesa tambe: Doño di refineria tabata premira paro di trabou di Citgo