WILLEMSTAD – “Si e situashon di refugiado venesolano eskalá Reino Hulandes outomátikamente mester tuma su responsabilidat pa Kòrsou.” Asina Lesley Fer, direktor di Kontròl di riesgo i maneho di kalamidat pa Kòrsou ta bisa.
Nashonnan Uní a deklará e situashon na Venezuela un krísis humanitario. Fer ta atvertí ku ‘lo krea un situashon destabilisadó si nos pasa nos kapasidat i nos no por manda e venosolanonan ilegal bèk.’
Lesley Fer den kombersashon ku Deya Mensche
Gastu di kada refugiado
Segun e esaki lo bai kosta gobièrnu 250 florin pa dia pa refugiado. Esaki ta pa gastunan básiko manera kuminda i hospedahe, i tambe kuido médiko, enseñansa i empleo. “Nos tin reto grandi pa loke ta trata finansa, lokalidat, konosementu i kapasidat pa por akapará un krísis humanitario.”
irektor di Kòntròl di Riesgo i Maneho di Kalamidat Lesley Fer. Potrèt: Deya Mensche
E bosero di UNHCR – Komishon di NA pa Refugiado, Aikaterini Kitidi djamars durante un konferensha di prensa a papia di un krísis humanitario. Segun Kitidi mas ku shen mil venesolano a bandoná nan pais kaba pa motibunan polítiko i ekonómiko. Nan ta keda den diferente pais di asilo sin dokumentashon.
No a firma e tratado di refugiado di NA
E deklarashon di UNHCR ta importante pasobra esaki a pidi su miembronan pa duna e venesolanonan akseso na e proseduranan pa refugiado den nan paisnan. Anteriormente promé minister Eugene Rhuggenaath a deklará ku gobièrnu di Kòrsou, pa motibunan ekonómiko i finansiero, aktualmente no por firma e tratado di NA pa refugiado.
Èks minister di Asuntunan Interior i Relashonnan den Reino, Ronald Plasterk, na sèptèmber a deklará ku ainda Hulanda no por hasi muchu kos, tanten ku e presidente venesolano Nicolas Maduro ta ninga ku tin un krísis humanitario.
‘Reino mester yuda’
E minister di Hustisia kurasoleño Quincy Girigorie aña pasá a entregá dos petishon, pa ayudo finansiero i forsa laboral, serka gobièrnu hulandes. Despues di e deklarashon di UNHCR mester hasi purá ku e petishonnan aki, e minister ta bisa. “Despues di diferente análisis di riesgo a sali ku nos tin e kapasidat pa yuda solamente 250 hende pa un temporada di tres luna. Ke men Reino mester yuda”, e ta enfatisá.
Minister Girigorie den kombersashon ku Deya Mensche
E minister ta bisa ku lo konstruí un sentro di detenshon ku un kapasidat pa 50 hende. Girigorie no ke konfirmá e lugá ainda, pero el a indiká si ku e konstrukshon lo kosta 285.000 florin, banda di e gastunan operashonal ku lo laba den 1.2 mion florin pa aña.
Minister Girigorie ta papia di gastu di akohida di refugiado venesolano
Ekspanshon di e baraknan
Tambe Girigorie ta indiká ku a pone 52.000 florin disponibel pa drecha e baraknan di prezu i ku e kapasidat a subi tripel pa shen persona. Segun Girigorie e gastunan di gobièrnu aktualmente ta 50 florin pa dia pa kada ilegal, pasobra ta usa e fasilidat di prizòn