ORANJESTAD – Pa awor Aruba no ta bay cera Venezolanonan ilegal mas. Nan si mester meld na autoridadnan.
E motibo ta cu e ta mucho caro pa detene nan, awor cu no ta conoci pa cuanto tempo e frontera entre Venezuela y Aruba ta keda cera. Asina departamento di inmigracion Iasa y Warda Nos Costa ta informa. Normalmente nan ta manda e ilegalnan Venezolano riba e prome vuelo disponibel pa nan pais bek. Sinembargo awor no tin vuelonan pa motibo di e embargo y esaki ta nifica cu e ilegalnan lo a mester keda hopi tempo cera.
Cu e maneho nobo aki nan por mantene nan gastonan abou, asina e instancianan ta bisa. Pero tin condicionnan si. E personanan indocumenta mester busca un persona local cu ta para garantia pa nan y percura cu e Venezolanonan ta meld diariamente na e instancianan concerni.
Diferencia entre turista rico y pober
E reglanan tambe a suavisa pa turistanan Venezolan cu no por biaha bek. Tin un diferencia si pa e turista ‘rico’ y esun cu no tin recurso. Esunnan cu recursonan suficiente por keda 1 luna na Aruba y awor por pidi extencion di nan estadia. Turistanan cu no tin e recursonan rekeri, mester tin un persona local cu ta para garantia pa nan. Asina nan por keda 90 dia.
E tipo di turistanan aki ta bin mas tanto pa traha na Aruba. Den e caso nan no por biaha bek pa Venezuela despues cu e termino a pasa, nan por keda tambe. Pero bou condicion cu nan ta meld tur siman na e autoridadnan concerni.