Pòrtrèt: Setar

ORANJESTAD – E arubano di 49 aña di edat Egbert Ivan Koolman na Miami a atmití kulpabilidat di labamentu di 1.3 mion dòler ku el a risibí komo èks manager pa pèrkurá pa kontrakt lukrativo serka su dunadó di trabou, e kompania di estado di telekòm Setar.

E estafa a sali na kla ora a menshoná su kompania den Panama Papers, e revelashon di e skandal mundial rònt di e kompania di impuesto panameño Mossack Fonseka.

E arubano a estafá su dunadó di trabou mas ku 10 aña ku dunamentu di kòntrakt lukrativo na kompanianan na Estádos Unídos. Pa esaki, segun e mes, el a risibí 1.3 mion dòler ku despues e tabata laba via kompania riba nòmber di entretantu su èks kasá i yunan.

E kaso ta dilanti wes merikano pasobra ta ei Koolman ta biba. No ta konosí si hustisia arubano tambe ta bai persiguié. E daño total pa Setar tampoko no ta konosí, e kompania di estado no ta divulgá masha di e asuntu.

E telefonnan selular ku Koolman tabata bende via e kompanianan merikano ku Setar, hopi bia tabata aparato usá. Esaki a bin sali pasobra kliente arubano tabata topa ku entre otro pornografia riba nan telefonnan kumpra ‘nobo’.