DEN HAAG – Presidente di direktiva di fundashon Humanitas, Gijsbert van Herk, djaweps anochi den un mail a pidi despensa pa su pronunsiamentunan tokante entre otro miembronan di personal antiano di e kas di kuido De Leeuwenhoek na Rotterdam.
E kos a bai malu ora Van Herk siman pasá den un entrevista ku e diario Trouw a trata di drecha e imágen negativo di De Leeuwenhoek pa medio di mustra riba e genio multikultural di e kas di kuido. “Si nos wak ku e brel hulandes di un enfermero ku hbo di Maastricht, si, e ora ei tin kos ta sosodé ku no por. Si bo wak ku un brel antiano, si, ta kiko ta e problema?”, segun Van Herk.
Na lugá di drecha e imágen negativo di De Leeuwenhoek ku e ponensia aki Van Herk a hañ’é ku rabia di hulandes antiano. John Leerdam, presidente di e organisashon di interes di antiano OCaN, ultimo dianan a risibí desena di yamada di hulandes antiano furioso, entre nan tambe miembronan di personal di e kas di kuido De Leeuwenhoek.
‘Ku un pronunsiamentu asina bo ta pone henter un grupo di poblashon un banda komo hende inkompetente sin kurason’- OCaN
“Na un dado momentu mi tabatin un señora na yoramentu na telefon, kende tin sigur binti aña ta traha ei”, Leerdam ta bisa. “Imaginá bo kon ku un pronunsiashon asina bo ta pone henter un grupo di poblashon un banda komo hende inkompetente sin kurason. E señora aki ku a traha masha duru mes pa kuida hende binti aña largu a keda kompletamente kibrá.”
Den e mail, ku ta den poseshon di Ret Karibense, Van Herk ta skibi na OCaN ku ‘nunka e no ker a pone un sierto grupo di trahadó un banda komo inkapas pa kuido òf pa traha na Humanitas.’ “Esei ta ridíkulo, lo ta ofensivo i inhustu i ken ku konosé mi sa ku mi ta bringa eksaktamente pa bai kontra di esaki. Ku esaki no solamente mi ta brasa e filosofia di Humanitas sino mi ta para habrí tambe pa komunikashon kla i transparente ku tur kolega i sinseridat den kuido i bienestar na Hulanda.”
‘Na nòmber di tur antiano ku ta traha duru den kuido nos ke despensa públiko serka Van Herk’- OCaN
E organisashon ku ta empeñá pa interes di hulandes antiano ta laga sa ku nan ‘ta apresiá e mail di Van Herk’, pero ku un despensa den mail no ta sufisiente. “Na nòmber di tur antiano ku ta traha duru den kuido nos ke despensa públiko di Van Herk. Nos ta biba den un tempu kaminda nos no ta aseptá mas ku por bisa sorto di kos asina. Ademas el a hasi su pronunsiashonnan robes públikamente, ke men por lo ménos e mester pidi despensa públikamente tambe”, asina direktiva di OCaN ta bisa.
Banda di un despensa públiko e organisashon di protekshon di interes di antiano huntu ku algun empleado antiano di De Leeuwenhoek ke bai papia ku Van Herk pa evitá e tipo di situashonnan aki den futuro.