Portrèt: Pixabay

DEN HAAG – Gabinete hulandes ta haña ku polítika na Aruba mes lo determiná kon lo saka e sèn di ganashi di gas i zeta.

Añanan largu Aruba ta lucha ku défisitnan grandi di su presupuesto. E isla ta spera di haña gas i zeta hasiendo boramentu komo prueba, pa asina por mehorá kuido i enseñansa na e isla.

VVD ta disgustá tokante e plannan di promé minister Evelyn Wever-Croes i a hasi pregunta den Kamer. VVD ke pa Aruba usa e plaka mésora pa redusí e défisitnan di e presupuesto.

Sekretario di Estado Raymond Knops (Relashonnan den Reino) no ke mete den e plannan. “E eskoho polítiko kiko hasi ku eventual sèn di ganashi di gas i zeta, ta na pais Aruba”, e ta laga sa djaluna den un reakshon riba preguntanan di VVD den Kamer.

Fondo separá
Promé minister Wever-Croes (MEP) di Aruba kuminsamentu di aprel a deklará ku e ta preferá di warda e ganashi sigurá den un fondo, pa asina e sèn no bai mésora riba un kuenta di gobièrnu ku tin un saldo hopi negativo. E ta sigui e liña di èks promé minister Mike Eman (AVP), su predesesor.

Aruba tin kampo di gas òf zeta?

Por lo pronto no ta sigur si Aruba lo yega asina leu ku den futuro e lo tin entrada èkstra di sakamentu di gas òf zeta. Tin indikashon si ku Aruba kisas tin un kampo di gas òf zeta den awanan teritorial, pero no ta kla si esaki ta ekonómikamente rendabel.

Boramentu eksperimental na yüni mester trese un kontesta definitivo. Ademas tin preokupashon pa medio ambiente, mas ainda pasobra e isla ta biba di turismo di playa i laman.

Sekretario Knops ta bisa si ku e ta kompartí e preokupashonnan ku VVD tin tokante e finansianan di Aruba. “Espesialmente e debe haltu di gobièrnu – ku mester baha – i ku no tin un presupuesto ku ta klòp pa vários aña.”

Knops a duna Aruba tempu te 30 di aprel pa drecha e presupuesto di 2018. E ora ei e presupuesto mester kumpli ku e konsehonan di e asina yamá College Aruba financieel toezicht (CAft, kolegio Aruba supervishon finansiero). Si esaki no sosodé, Konseho di Minister di Reino por disidí pa ainda fòrsa Aruba di hasi esaki.