PHILIPSBURG – Hulanda ke dominá e krísis den Karibe hulandes ku a surgi despues di e beslag di e gigante di zeta merikano ConocoPhillips riba e infrastruktura i stòk di PdVSA, e kompania di estado di zeta venesolano.
Tambe a pone beslag riba e refinerianan i fasilidatnan di almasenahe ku PdVSA ta hür na e islanan Boneiru, Kòrsou i Sint Eustatius, pero esei ta ‘infrastruktura krítiko’ di Reino.
Sekretario di estado di Asuntunan Interior i Relashonnan den Reino Raymond Knops ta ‘spera riba indulgensia’di Conoco. E ta preokupá pa e stòknan di energia i e empleo na e paisnan i islanan di Reino. Asina el a laga sa na su último bishita na Sint Maarten.
Kontakto ‘trabahoso’ ku Venezuela
“Tin kontakto di gobièrnu ku e paisnan outónomo i áreanan di gobièrnu tokante kon mester trata e asuntu. Nos ke tene e konsekuenshanan negativo mas chikí posibel, garantisá e siguridat di energia i pèrkurá pa no tin e menasa di pèrdida di empleo.”
El a bisa tambe ku e minister hulandes di Asuntunan Eksterior a hasi kontakto ku Venezuela i ku na nivel di gobièrnu ta koperá, pero ku esaki ta bai na un manera ‘difísil’.