Pòrtrèt: Jean Mentens

PHILIPSBURG – E promé minister hulandes Mark Rutte durante di su bishita na Sint Maarten mésora a atvertí ku no ta probabel ku tur kos ta kla kaba pa e próksimo temporada di orkan.

“Si bo mira ku kuantu retraso e rekonstrukshon a kuminsá, bo mester wak kon bo por hasi mas tantu posibel pa un próksimo temporada di orkan. Prioridat number unu e ora ei ta kapasidat di shèlter.”

Rutte ta bai chèk awe mes serka gobièrnu lokal si tin sufisiente di esaki. Otro prioridatnan ku e ta menta ta e dùmp di shushi na kandela i prizòn.

Falta di konfiansa
E promé minister tin konfiansa den e gobièrnu provishonal di Sint Maarten bou di guia di Leona Marlin-Romeo. E konfiansa aki no tabat’ei anteriormente i p’esei ta awor numa el a bini e isla pa duna e señal di komienso pa e ayudo despues di orkan Irma, ku na sèptèmber a kousa tantu daño.

“Promé Hulanda mester a haña kòntròl riba supervishon di frontera i kombatimentu di korupshon. Pasobra bo no por splika e pagadó di impuesto hulandes ku bo ta bai hinka mas ku mei miar dòler den Sint Maarten sin seguridat ku a tuma sufisiente medida. E situashon di último añanan a bai muchu hopi atras pa tin e konfiansa ei. No tabata por.”

“E velosidat serka algun kos ta muchu abou”

E sekretario di estado di Relashonnan den Reino Raymond Knops ku tambe a biaha huntu ta añadí ku Hulanda ta dispuesto di duna ayudo, pero ku ta ferwagt un esfuerso mas grandi di gobièrnu lokal. “E velosidat serka algun kos ta muchu abou. E problemasia di e seru di shushi, e prizòn. Mester traha mas lihé. Staten mester traha mas lihé, a entregá e presupuesto muchu lat.”

Tantu Knops komo Rutte ta enfatisá di nobo ku Hulanda ta dependé di Sint Maarten komo pais soberano. “Nos no t’aki pa tuma kosnan ofer.”