Portrèt: Sharina Henriquez

ORANJESTAD – ‘Rabiá i desapuntá’ èks minister Paul Croes ta ku e enfoke i trato di dje komo sospechoso mayó den e kaso di korupshon Ibis.

Djárason tabatin e promé seshon di preparashon. Ei Croes a kibra su silensio di mas ku un aña. E ta akusá algun prensa di a kopia informashon di Ministerio Públiko (OM) sin buska drechi. Prensa segun e ke duna e impreshon ku ta trata di e ‘kaso di korupshon di siglo’. P’esei e no a papia durante di e interogashonnan di polis.

Tabata difísil pa Croes defendé su mes. E ta konta ku OM un bia a entregá 1000 página den su sèl. “Anochi, pero despues di mei ora a paga lus, obligatoriamente. Miéntras ku lo a interogá mi e siguiente meinta. Segun OM ta e printer tabata dañá, p’esei no por a entregá e teksto mas trempan.”

“Donashon chikí, manera algun kaha di serbes”

Awor parse e kaso di korupshon no ta asina grandi mes, manera OM ke sugerí, e èks minister ta bisa. “Mas o ménos 900 kompania lo tabata envolví, a duna 2000 dispensashon di pèrmit di trabou. Dos listramentu di kas seka mi i mi a keda 86 dia den sèl di kua 80 den limitashon. Pero awor parse ta trata di 15 kompania so. I di donashon chikí na mi fundashon (Leadership in Excellence, red.) manera algun kaha di serbes pa evento polítiko. Loke ta normal pa otro polítiko aki, pero aparentemente no p’ami.”

E èks minister di Labor ta haña ku hustisia inhustamente ta trat’é komo kriminal pisá. E ta mira su mes mas komo un víktima di falta di un lei pa finansiamentu polítiko na Aruba. “Kisas esaki ta un momento adekuá pa kuminsá di konsipiá e lei.”

Mester trata e kaso penal pa kontenido ainda i p’esei Croes ta reservá den kontesta tokante e akusashonnan, pero na final e ta bisa ku e no a risibí ‘fabor òf pago pa dispensashon’ di pèrmit di trabou pa trahadó strañero. Ademas tur kos a pasa ‘transparentemente’ via su fundashon.

Awor e esposa tambe ta sospechoso
Pero den korte ta bisa ku Croes si lo a enrikesé su mes personalmente via e fundashon. Su shafùr, sospechoso tambe, entre otro ku e plaka di e fundashon lo a paga debe di estudio di Croes den eksterior.

Tin 24 sospechoso, entre nan sorprendentemente su esposa Melony. Ku awa na wowo e ta deklará na wes: “Niun kaminda den e 20 mil páginanan di e fail no ta menta mi nòmber. No tin otro motibu ku solamente ku mi ta e esposa di Paul Croes.”

Meskos ku su kasá, ta sospech’é di tabatin un trahadó doméstiko ilegal i di labamentu di plaka. Tambe OM ta sospechá Paul Croes di soborno pasivo, mal uso di su puesto, malversashon di plaka di fundashon, i partisipashon na un organisashon kriminal den un puesto di mando.

Kastigu pisá
Fiskal Gerretschen ta papia di ‘kudishi’ i ‘instigá ámtenar pa kometé sierto akto’ i fabor pa amigu. E sospechosonan ta entre otro ámtenar, intermediario di pèrmit i kompania ku a soborná e minister. Un kantidat chikí a papia, loke den un komunidat chikí ta hopi mas difísil, fiskal ta bisa. “Ku esaki nan a mustra kurashi.”

P’esei OM ke kastigá e otro sospechosonan pisá, pasobra e mayoria di nan no ker a koperá i a keda ketu. Esaki ta konta pa Paul Croes tambe, pero esaki di repente djárason den korte a mustra ku e ta dispuesto na papia.