Portrèt: Vader Piet

ORANJESTAD – E parke di bientu nobo na Urirama definitivamente lo no sigui, pero e ekplotadó no ta aseptá esaki. Den negoshashon ku gobièrnu e ta trata di logra haña mulina di bientu èkstra na e parke di bientu eksistente na Vader Piet.

Djabièrnè último konseho di minister a disidí di retirá e pèrmit di molèster pa e parke di bientu kontroversial ku ocho mulina. Habitantenan den besindario ta protestá for di tempu ku e gabinete anterior di AVP a anunsiá e di dos parke di bientu.

Nan tabatin miedu espesialmente pa nan salu i di molèster di boroto. Tambe tabatin prekupashon pa molèster pa e lugá di peregrinashon famoso, Kapia Alto Vista. E kapia aki ta un atrakshon túrístiko popular tambe.

Kantidat di mulina di bientu nobo
Na 2014 gobièrnu a duna e pèrmit i a sera un kòntrakt di entrega ku e eksplotadó Hutting. Pa motibu di e mésun akuerdo ei ainda Hutting por sinta rònt di mesa ku e gobièrnu aktual, ounke e di dos parke di bientu no ta sigui mas. E meta ta pa instalá mas turbina di bientu na e parke di bientu Vader Piet na San Nicolas. Hutting su kompania a instalá e parke di bientu ei tambe na 2008. For di e tempu ei kaba e tabata hasi negoshi ku e gobièrnu di MEP. E partido aki awor ta den gobièrnu atrobe.

E kliente di energia di bientu ta e kompania nashonal di energia WEB. Aktualmente nan ta investigá kuantu turbina di bientu èkstra por pone aserka. “Nan ta bisa entre seis pa ocho, pero por bira dies tambe”, segun Hutting.