Pòrtrèt: Pixabay

DEN HAAG – E plan di PVV pa manda hende kriminal di Aruba, Kòrsou i Sint Maarten bèk nan isla, tin poko chèns. PVV a konta ku sosten di CDA i VVD pero e no ta hañ’e.

Tur dos partido di koalishon ta rekonosé e imágen ku PVV ta pinta di ‘kriminalidat haltu bou di antiano na Hulanda’ pero nan ta haña e proposishon di lei aki ‘inalkansabel’ i ‘imposibel pa ehekutá’.

‘No serio’
Diferente partido den Tweede Kamer ta iritá ku PVV no ta tuma e krítika di Konseho di Estado ‘serio’. E konseho ta bisa entre otro ku e plan no ta alkansá su meta i ta kontra lei pasobra e ta distinguí entre hende hulandes.

Kader:

E lei pa Manda Antiano Kriminal Bèk

E tres islanan outónomo mes tin un lei ku ta pone eksigensia riba tur hulandes oropeo ku ke biba na e isla. Hulanda tambe mester por pone eksigensia na hulandes karibense, PVV ta haña.

E proposishon di lei ta enserá ku lo manda bèk tur arubano, yu di Kòrsou i hende di Sint Maarten mésora si a kondená nan na Hulanda na un kastigu di prizòn, kastigu di tarea òf detenshon hubenil. E lei ta konta pa hóben i bieu i ta konta tambe si un hende por ehèmpel a haña un kastigu di prizòn di un dia.

Hasi palabrashon ku Aruba, Kòrsou i Sint Maarten
E partidonan CDA, SP, PvdA i SGP aktualmente no ta mira mas chèns pa hasi palabrashon ku e gobièrnunan di Aruba, Kòrsou i Sint Maarten. Den un Lei di Reino den un tiru lo bini tur eksigensia di establesimentu pa tur parti di Reino.

E miembro di Tweede Kamer Ronald van Raak (SP) ke klaridat di gobièrnu hulandes si Aruba, Kòrsou i Sint Maarten posiblemente tin un maneho pa pone hóben ‘ku no tin futuro òf ku no por mantené riba un avion pa Hulanda’. “Nos no tin mester di lei pa esaki sino palabrashon polítiko.”

Ainda e debate no a kaba
E trato di e proposishon di lei no a pasa ainda. E presentadónan Fritsma i Machiel de Graaf (PVV) na un momentu mas lat por trata tur pregunta ku a hasi awe den Tweede Kamer.

Durante e di dos debate aki lo sali tambe si PVV ta dispuesto pa adaptá e proposishon di lei pa manda hulandes karibense kriminal bèk. Un proposishon di lei di VVD pa pone eksigensia na establesimentu, no a haña un mayoria na 2016.

Delegashon di parlamentarionan di Aruba durante e debate. Potrèt: Tweede Kamer