DEN HAAG – Defensor di Pueblo Nashonal tin hopi krítika riba polítika di Den Haag tokante e rekonstrukshon di Sint Maarten. Esaki no ta progresá i e isla ‘no ta seif’, asina defensor di pueblo Reinier van Zutphen ta bisa.
Segun e Defensor di Pueblo Nashonal polítika na Hulanda i Sint Maarten mester tuma akshon rápido pa laga e rekonstrukshon kuminsá kore. “Si aworakí bini un orkan chikí ku hopi áwaseru e desaster lo ta enorme”, segun Van Zutphen despues di su bishita na Sint Maarten.
‘Masha peligroso’
E situashon na Sint Maarten pa hopi habitante ta ‘masha peligroso’ segun Van Zutphen, pasobra hopi kas ainda no por wanta ni e orkan di mas chikí.
“Tur hende ta bisa: ‘ta masha urgente’ ma mi no ta mira ku ta transformá e urgensia aki den akshon”, segun Van Zutphen. “Mi tin e impreshon ku tin un òf dos proyekto ta kana bon, pero e otronan niun tiki.”
Den Haag ta responsabel pa e rekonstrukshon ku ta tarda hopi
E defensor di pueblo ta apelá na polítika di Den Haag pa tuma responsabilidat, pa asina e rekonstrukshon kuminsá mas lihé. “Den Haag a pone e sèn disponibel i ta nan mester pèrkurá pa usa e sèn bon.”
Gobièrnu di Sint Maarten mes tambe ta haña krítika pisá di defensor di pueblo. Nan a primintí e siudadanonan di drecha nan dak, pero no ta kumpli di niun manera, asina Van Zutphen ta bisa.
Bishita na Islariba
Defensor di pueblo di Hulanda último dianan a bishitá Sint Maarten, Saba i Sint Eustatius. E motibu di mas importante di su bishita tabata pa e mes mira konta bayendo ku e islanan despues di e destrukshon di e orkannan Irma i Maria na sèptèmber di 2017.
Na Sint Maarten entre otro defensor di pueblo Reinier van Zutphen a papia ku promé minister interino Leona Marlin-Romeo, presidente di parlamento, ku diferente organisashon sosial i tambe ku su kolega defensor di pueblo na Sint Maarten.