Pòrtrèt: Pixabay

UTRECHT – E kantidat di konmemorashon di e víktimanan i e abolishon di sklabitut na Hulanda ta oumentá. Utrecht, Tilburg i Den Haag riba promé di yüli ta tene un konmemorashon ofishal.

E munisipionan a pone sèn disponibel espesialmente pa esaki. Durante e konmemorashonnan mandatario lo pone krans i tira spich. Tradishonalmente na Amsterdam, Rotterdam i Middelburg un konmemorashon di sklabitut lo tuma lugá.

Rònt di promé di yüli na Hulanda lo tin diferente inisiativa di siudadano tambe, por ehèmpel na Gouda, pero eseinan no tin finansiamentu di munisipio. Na e munisipio di Apeldoorn e partido SP lokal i Partij voor de Dieren ta boga pa un konmemorashon ofisial.

Na Amsterdam NiNsee for di 2002 kada aña riba promé di yüli ku supsidio di munisipio ta organisá un konmemorashon nashonal di abolishon di sklabitut na Sürnam i Antia. Segun e organisashon ‘a kuminsá un époka nobo’: munisipionan mas i mas lo ta mira e importansha di e konmemorashon di e parti aki di historia hulandes.

“Awor ta falta gobièrnu hulandes ainda”, segun direktor di NiNsee Urwyn Vyent. “Alafin ta un konmemorashon i selebrashon nashonal nos ke, meskos ku 4 i 5 di mei.”

‘Promé di yüli mester bira mes klaro ku 4 i 5 di mei.’
“Konmemorashon di sklabitut no ta mes klaro ku 4 i 5 di mei”, NiNsee ta bisa. Kada aña di nobo nos mester pidi supsidio serka munisipio p’esaki. Esei ta trese insertidumbre, pasobra por nenga un petishon.”

Nos ke traha den direkshon di un rekonosementu nashonal di e konmemorashon di sklabitut, pa asina promé di yüli bira mes klaro i nos por uni hulandesnan kuné.

Pakiko promé di yüli?

Despues di 240 i piku aña Hulanda ofishalmente ta abolí sklabitut riba promé di yüli di 1863. Ku esaki Hulanda tabata un di e último paisnan oropeo: Inglatera i Fransha a abolí sklabitut na 1833 i 1848.

E markanan di e historia di sklabitut di Hulanda te dia di awe por mira por ehèmpel na e fachadanan di e kasnan grandi na e kanalnan na Amsterdam i Utrecht , i e Shèrs di Oro ku tin bia rei ta kore aden.

Tambe den kultura di surinameño i antiano historiadónan ainda ta mira hopi marka di e pasado di sklabitut: den idioma, baile, muzik, kustumber, opinion, relato, vestuario, lensu di mara kabes i kuminda por ripará tur e markanan ei ainda.