Pòrtrèt: Krus Kòrá/Kiwanis

ORANJESTAD – Krus Kòrá Aruba i Kiwanis Club Aruba ku e kampaña nashonal ‘No sconde mas’ (no skonde mas) ke pone un fin na e tabú riba abusu i maltrato di mucha na e isla.

E kantidat di denunsia di abusu i maltrato di mucha ta sigui subi. Den e promé mitar di 2018 a mèldu 54 kaso kaba serka e persona di konfiansa i dòkter di mucha Louise Rafael-Croes. Pero e sifranan berdadero ta muchu mas haltu, asina Egbert Schwengle, lider di proyekto di e kampaña ta bisa.

“Ta posibel ku e sifranan ta tres te kuater bia mas haltu. Pero lagá mi menta un kantidat konservativo kaminda ku e kantidat berdadero ta dòbel. Víktima di abusu i maltrato te ainda tin miedu di bini dilanti. Pasobra e kos ta keda un tabú na e isla i nos mester kibra e tabú.”

Despues di fakansi grandi Krus Kòrá i Kiwanis ta bai den e barionan pa trese e tópiko aki mas bou di atenshon.

Evitá kasonan trágiko
E organisashon di e kampaña ke lanta Aruba for di soño tambe pa evitá kasonan trágiko, manera morto di e rumannan Rishandroh i Eugène (e dos chikitinnan ku nan padrasa a bati mata).

Èks-gobernador Fredis Refunjol tambe ta partisipá na e kampaña kontra abusu di mucha – potrèt: Krus Kòrá/Kiwanis

Vidio i poster ku arubano konosí, manera èks-gobernador Fredis Refunjol ta yama víktimanan pa nan mèldu na organisashonnan di ayudo. I ta yama espektador pa no sigui neglizjá señalnan di maltrato i abusu.

Norma Brinkenberg, presidente di Kiwanis Club Aruba: “Tantu na skol komo na kas, i tambe bisiña mester ta alerto. Bou di hubentut tambe tin hopi ponementu di man. Bo tin un amiga i bo ta batié manera bo ta haña bon. Esei no ta normal.” Tambe e ta bisa ku no ta hende hòmber so tin man lòs, hende muhé tambe. Tantu físikamente komo ku verbalmente.

Koperashon ku e punto di mèldu ofisial
E kampaña ta para lòs di e plan di gobièrnu pa lanta un punto sentral pa mèldu maltrato di mucha i abusu di mucha. Pero lider di proyekto Schwengle no ta ekskluí koperashon den futuro. “Ku e kampaña aki nos ke enkurashá e organisashonnan ku ta trata ku esaki diariamente. I mustra ku nos mester trata esaki huntu.”