Pòrtrèt: Lisette Gomes

ORANJESTAD – 15 aña sèl i tratamentu TBS sin durashon máksimo. Esei ta e kastigu pa e padrasa Gabriel Martin pa e maltrato severo i batimentu mata di Eugene di 3 aña i Rishandroh di 5 aña.

Ta promé bia ku un wes arubano ta duna un kastigu di TBS. E isla no tin klínika di TBS. Ta investigá pa eventualmente habri un klínika TBS na Kòrsou, wes ta bisa, pa hende kondená na Aruba, Sint Maarten, Saba i Sint Eustatius.

Pero si e klínika aki no bini Aruba mester investigá si por manda e kondená un klínika na Hulanda. Pasobra wes ta enfatisá , i ekspertonan tambe a konkluí durante e investigashon: sin trato e chèns ta grandi ku Martin atrobe lo usa violensia kontra hende.

TBS despues di 10 aña den sèl
E padrasa ku a bati e dos rumannan mata aña pasá i tambe a dera e kurpa sin bida di esun mas chikí den mondi, tin un ‘defekto di personalidat antisosial ku karakterístika sikopátiko hopi kla’. Tambe e ta moralmente ménos kapas.

Martin mes no tabata presente na e sentensia, i tampoko e tata di e rumannan. Tabata ketu den korte kompará ku e komoshon na e seshon di 15 di yüni. E bia ei korte no a konta ku tantu hende asina. Pa motibu di e mal organisashon di e vigilansia, a ninga entrada na famia manera por ehèmpel e wela. Kaminda ámtenar di diferente departamento, Ministerio Públiko i studiante di lei tabata sinta den tribuna públiko.

Despues di un disturbio kòrtiku ku famianan emoshonal, na final ta e wes a intervení i a atmití e famianan. Mas despues korte a pidi despensa den un deklarashon. E famia tabata masha rabia ora nan a tende e eksigensia di OM. Nan a hañ’é muchu abou. No ta konosí si ta p’esei nan no a bini awe.

Ainda no a kondená e mama di e ruman hòmbernan. Wes ta haña ku mester di mas investigashon di su parti de e kaso.

Malechor ku enfermedat síkiko

E fasilidatnan pa malechor ku problema di kondukta i otro problema síkiko na Aruba ta masha limitá. E prizòn KIA ta sera e personanan aki huntu ku e otro prezunan i apénas tin guia.

Esei a sali na kla tambe den e kaso di Eugène Lampe ku a mata su mayornan i su ruman hòmber. Lampe tabata adikto ku problema síkiko. Pero e tempu ei wes no por a duna TBS pasobra e kódigo penal tabata antikuá ainda. Pasobra e chèns di ripitishon sin tratamentu obligatorio tambe tabata haltu, wes a hañ’é fòrsa di duna un kastigu di sèl mas haltu.
For di 2012 TBS ta posibel si, pero pa falta di un klínika di TBS na e isla, nunka no a duna e kastigu ei. Te awe.