ORANJESTAD – Riba un sòlder chikí kalor na San Nicolas ya pa añanan largu tin un kolekshon di arte importante ta dekaí. Doño Louky Constandse ta spera ku algun dia e por ward’é otro kaminda i tene un eksposishon.
E kolekshon ta di añanan sinkuenta i Erna Giesel, mama di Constandse, ta e pintor. Na 1953 el a muda di Hulanda pa Aruba pasobra su kasá a bai traha ei komo dosente.
Pa mata tempu Giesel tabata pinta. El a laga e forsa di naturalesa arubano inspir’é. El a pinta entre otro e brùg natural, orkan Hazel i kosta nòrt. Den sinku aña el a produsí kasi dosshen obra di arte, di kua el a bende un parti ku merikano ku e tempu ei tabata traha na refineria Lago.
Herensia kultural importante
“Esaki ta di kalidat haltu i espesial pa motibu di e kòntèkst den kua a pint’é”, Renwick Heronimo, kuratòr di e fundashon kordinadó di museonan arubano (Fundacion Museo Arubano) ta bisa ora e mira imágen di e pinturanan. Den e arte e ta rekonosé influenshanan di Van Gogh.
Den e añanan ei tabatin mas arte di paisahe, pero no manera Giesel a traha, Heronimo ta splika. “Esei tabata mas idíliko.” E ta deskribí e trabou di Giesel komo ‘impreshonista’ kaminda a hasi uso di ‘eksperensha i e sintimentu di e momentu’. “Esaki sigur ta herensia kultural importante pa Aruba. Lo ta bunita si un selekshon di esaki resultá den nos kolekshon lokal.”
Den publisidat
E potrèt ku Paul Citroen a pinta di Erna Giesel – potrèt famia Giesel
Na 2012 Constandse a ekshibí un parti su mama su obranan den koperashon ku fondo di kultura Unoca. Pero pasobra un obra stimá a pèrdè, esta un potrèt di Giesel ku su maestro Paul Citroen (pintadó famoso hulandes) a traha, el a keda ku miedu di djis duna hende su kolekshon bai kuné.
“Lo mi haña bon pa warda e kolekshon un kaminda, basta e ta bon sigurá, Ta un propiedat di hopi balor. Pero te awor mi no a haña un kaminda ainda ku mi ta konfia.”
Awor ku el a drenta publisidat, Constandse ta spera di haña un bon lugá pa e pinturanan. “Ta pika si no hasi nada ku nan, pasobra ta un herensia imortante pa Aruba.”E mes ta preferá si warda e pinturanan na San Nicolas. “Pasobra ta aki mi mama tabata biba ántes.