16 August 2018 | Natasja Gibbs

AMSTERDAM- Aña di skol nobo ta bai kuminsá, pero Gabriella di diesdos aña di Amsterdam no a inskribí niun kaminda ainda. E lo preferá di bai un vmbo kader-school manera su Citoscore ta rekomendá, pero esei no por.

For di 2015 na Hulanda ta e rekomendashon di skol básiko ta konta pa alumnonan di grupo 8. I pa Gabriella esei ke men VMO básiko ku Leerwegondersteuning (LWOO). Segun Varida Omzigt, mama di Gabriella, ta trata aki di supkonsehamentu. I e no ta e úniko ku ta haña ku esaki ta molestié.

Mas ku shen relato
Un apelashon di Ret Karibense riba medionan di komunikashon sosial tokante supkonsehamentu a trese mas ku shen relato negativo for di e komunidat karibense na Hulanda. Manera: “Mi yu muhé a haña konseho pa havo, miéntras ku te grupo 7 e tabatin konseho pa havo/vwo. El a traha su Cito na nivel di gimnasio pero e dosente a ninga di kambia esaki.”

Leroy Lucas i Varida Omzicht ta komparti nan relato. Varida ke hasi tur kos pa ahustá e konseho pa skol di su yu muhé i pa poné riba vmbo-kader. Pa Leroy e ahuste entretantu ta ‘muchu lat’. Na su edat di kuarenta aña e ta mira bèk riba un desvio difísil pa bai hbo pa motibu di supkonsehamentu.

Skucha e podcast aki (na Hulandes)

Natasja Gibbs a bai buska e impakto di supkonsehamentu den enseñansa riba e komunidat karibense. Por tende tur relato i deskubrimentu den e podcast Koninkrijkskwesties di NPO Radio 1 .

Abona via iTunes

E organisashon di konsumidó di enseñansa (OCO, Onderwijs Consumenten Organisatie) na Amsterdam ta mira ku e aña aki tambe hopi mayor ku ta prekupá pa e kambio di enseñansa básiko pa enseñansa sekundario pa nan yu. Entre yanüari i yüni a drenta 300 pregunta serka e organisashon. “Di e preguntanan 67 tabata trata di e konseho di skol. I no pa konta kon satisfecho nan tabata”, e investigadó i kordinadó di konosementu Kaja Sariwati ta konta.

Etnisidat
Segun aktivista di e movementu Wit Aan Zet ‘profilashon étniko ta hunga un papel grandi den e supkonsehamentu di alumno’. No tin sifra pa soportá esaki. “Esaki lo a kumbiní si pasobra e ora ei nos lo por a duna mas klaridat, pero simplemente no tin”, segun OCO.

Edukashon di e mayornan
Un rapòrt di investigashon di Inspekshon di Enseñansa ( E Estado di Enseñansa 2016-2017) ta mustra bo si ku e edukashon di e mayornan por tin influensha riba e konsehonan pa skol di nan yu. Alumno ku mayor ku tiki edukashon hopi bia ta haña konseho pa skol mas abou kompará ku alumno ku ta presta meskos i ku tin mayor ku edukashon haltu. Ademas tin ménos adaptashon di e konsehonan pa skol di alumno ku mayor ku ménos edukashon.

Aboná riba e podcast awor

Ret Caribense (NTR) den koperashon ku NPO Radio 1 ta traha e serie Koninkrijkskwesties. Ta fásil pa aboná via iTunes. Natasja Gibbs i John Samson ta papia ku bo tokante diferente tópiko, manera lanta sin tata, polítika i intimidashon den un komunidat insular chikí i e papel ku idioma papiamentu ta hunga den edukashon.