Portrèt: Sharina Henriquez

PHILIPSBURG – “Te awe nos ta esklabo” “Laga nos lidernan liderá nos.” “Afó ku Hulanda.” E demonstrashon silensioso djárason ‘Stand for SXM’ pa un Sint Maarten mas fuerte, a resultá di ta espesialmente un protesta na bos haltu kontra envolvimentu hulandes.

“Hulanda ta konosí komo e lugá di droga di mas grandi na mundu. E ora ei mi ta haña masha straño ku nan ta bin bisa aki ku nos ta riba mal kaminda”, e demonstrante Josianne Fleming-Artsen, ku di 2014 te 2015 tabata minister plenipotensiario na Hulanda, ta bisa.

Outor Tim van Dijk (Na Ingles)

Segun polis un 250 hende a protestá. Un kombinashon di polítiko i siudadano prekupá. Rhoda Arrindell di e organisashon I Stand Up for St. Maarten Foundation, ta bisa ku mas ku mil hende tambe a firma un petishon.

Mas outonomia
Ku esaki esnan ku a firma ta pidi parlamento pa aktua riba kuater punto. E puntonan aki espesialmente ta mustra dede inkriminante riba Hulanda ku lo ta stroba e isla di tin mas outonomia.

“Hulanda ta mete muchu, e hendenan ta haña aki. Nos ta kolaborá ku defensa, nashonalidat i asuntunan eksterior. Pero sobrá Hulanda mester laga na nos, ta p’esei nos tin outonomia”, Elton Jones, ku tambe ta di e organisashon, ta bisa. Arrindell i Jones tambe ta aktivo polítikamente na e isla.

Den e petishon tin pará ku mester bolbe organisá e referèndem di pueblo tokante konstitushon. E konstitushon ei mester bira mas moderno, esnan ku a firma ta haña. Ademas nan ke pa gobièrnu hulandes tene su mes na e konvenio di Nashonnan Uní pa outonomia.

E demonstrantenan , ku tabata skander ‘Enough is enough’ i ‘Let our leaders lead’, òf tabata kanta himno, no ta bai parlamento so. Representashon hulandes, Ministerio Públiko, gobernador i komo último gobièrnu tur ta haña un kopia di e petishon kompañá pa gritunan di protesta.”Nos ke pa nan tambe sa kiko ta pasando” , Jones ta bisa.

Ministerio Públiko ta persiguí ‘selektivamente’
Ministerio Públiko (OM) ta un blanko importante di e protesta. Pasobra e petishon ke un investigashon tambe di e funshonamentu di hustisia. I espesialmente di e manera di traha di OM ku ta investigá i persiguí ‘selektivamente’, segun e protesta.

Ku esaki sigur ke men e persekushon di e lider di United Democrats Theo Heyliger. Siman pasá Korte Komun di Hustisia a husga ku por persiguí Heyliger, ku huntu ku su partido a gana e último elekshonnan. Pa soborno di un kolega parlamentario seis aña pasá.

E demonstrashon anto tambe tabata pa enkurashá Heyliger. I pa akusá Hulanda ku nan ta stroba e lidernan lokal di hasi nan trabou. Kaminda nèt despues di orkan Irma nan mester traha masha duru pa lanta e isla pon’é riba pia atrobe.

Theo Heyliger, lider di United Democrats – potrèt : Sharina Henriquez

‘Pasobra Sint Maarten por a hasi esaki e mes masha bon, sin e konstrukshon di Banko Mundial’, Heyliger ta bisa. E ke men e 470 mion euro ku Hulanda a pone na Banko Mundial pa rekonstrukshon di Sint Maarten despues di e orkan.

Heyliger ta kana poko skondí, patras den e marcha di protesta. Pa evitá ku hende lo pensa ku ta e a organisá e demonstrashon.

Theo Heyliger (Na Ingles)