Pòrtrèt: Sharina Henriquez

PHILIPSBURGH – “Si un orkan pasa aworakí, nos lo ta mihó prepará sigur, kompará ku aña pasá ku Irma”, Joost Ruigrok ta bisa di parti di Krus Kòrá Sint-Maarten.

Ruigrok ta sigui splika ku ya no ta duna asistensia di emergensia. Tampoko ta parti bòn di kuminda mas. E programa ei, ku a yuda 4000 hende, a para na kuminsamentu di sèptèmber.

Papiando di ku si e famianan ei lo por sin e yudansa, Ruigrok ta bisa: “No ta e intenshon ku nan ta keda dependé di nos. Nos ke hasi e hendenan outosufisiente.”

P’esei e programanan di Krus Kòrá ta enfoká riba yudansa duradero awor. Manera e program pa drecha kas den kua e famianan ta haña bòn pa materialnan di konstrukshon. A palabrá ku goibèrnu ku e organisashon pa yudansa lo yuda nuebe bario.

Kolaboradónan di Krus Kòrá ta drenta e barionan pa kontrolá kon e trabounan di konstrukshon ta kanando i ku si esakinan ta hasiendo e kasnan mas resistente pa orkan. Tambe nan ta invitá e habitantenan pa nan partisipá na un tayer riba kon ta konstruí mihó. E promé bario ku Krus Kòrá ta yuda, ta Dutch Quarter ku a keda severamente asotá.

Fondo rekoudá
Ku e fondonan ku a rekoudá, Krus Kòrá ta yuda e víktimanan di Irma pa tres aña. Di esaki un aña a pasa kaba. A kolektá 19 mion euro na Hulanda I ta usando e sèn ei pa e programanan di ayudo duradero.

Na Kòrsou Krus kòrá a kolektá algu mas ku 550.000 euro. No a usa e sèn ei ainda. “E sèn ei ta destiná pa Sint-Maarten, Saba I Sint-Eustatius i ta reserv’é pa término largu”, Ruigrok ta bisa. “E luna akí un delegashon di Kòrsou lo bin konsultá ku e otro departamentunan pa papia di e nesesidatnan aktual i na unda lo ta bon pa usa e sèn.”

Na Aruba a kolektá 110.000 euro i a usa e sèn ei pa e transporte aerio di pakete di kuminda, tres pikòp i 40 boluntario ku a bin yuda vários biaha – te asta promé ku e orkan.

Na Boneiru a kolektá algu mas ku 60.000 euro i a usa esei pa yudansa di emergensia manera awa pa bebe, pakete di kuminda i tapol.

Ambulans sin uso
Segun Ruigrok e situashon na Sint-Eustatius ta mehorando. Krus Kòrá a kai afó un ratu ei, pa skarsedat di boluntario, pero entretantu a bini un tim nobo.

E sitio di refugio tambe tabata un desaster, te ku algun luna pasá. Remarkabel tabata e bista di tres ambulans i un vehíkulo militar para pòrnada den e kurá. Segun esunnan ku por sa, e vehíkulonan ta muchu grandi pa usa den e kayanan smal.

“No a usa nan mas pasobra e isla ta asina chikitu, ku e ambulans di hospital ta yega tur kaminda den algun minüt”, Ruigrok ta konta. P’esei a disidí siman pasá pa bende e ambulansnan.