Pòrtrèt: Peter Eikelenboom

WILLEMSTAD – E habitantenan di e bario ‘lubidá’ Zwaan – un bario parti pafó di Willemstad – ta bai transformá nan idea- i deseonan den plannan konkreto huntu ku studiantenan di e fakultat di Bouwkunde di e Universidat di Kòrsou (‘UoC’).

Teksto ta sigui despues di e vídio

Di Peter Eikelenboom (Hulandes i Papiamentu) (Nederlandse ondertiteling)

Dor di e atenshon ku Caribisch Netwerk a dediká anteriormente na e bario marginá pegá ku Scharloo, e plan a nase serka e studiantenan pa hasi un tarea di estudio ku un problema real di Kòrsou. Esaki a kondusí na un kolaborashon entre e universidat, fundashon Swaen i Besindario i tambe Unidat di Bario.

Enkuesta promé paso
Komo promé paso a tene un enkuesta bou di e habitantenan di e bario. Sinku grupo di dos boluntario tabata drenta e bario den fin di siman ku un formulario di pregunta.

‘Tin habitante sin koriente, awa pa bebe òf tualèt

Tin preguntanan tékniko tokante e kalidat di e bibiendanan, pero tambe tokante akseso na awa pa bebe, elektrisidat, tualèt, ducha, kushina, etc. Den algun kaso e habitantenan mester kontestá ku nò riba un pregunta asina. Tin ku a regla algu ku bisiña pa por tin koriente.

Ilegal
E konstrukshonnan riba e tereno ta ilegal. E tereno ta di gobièrnu. E insiguridat ku esaki ta trese kuné ta pone ku e habitantenan a konstruí un dak riba nan kabes ku un mínimo di material.

Ta wak e situashon sosial tambe, di e habitantenan. Esei ta konserní e kolaboradónan di fundashon Unidat di Bario. Nan ta wak kon lo por yuda e habitantenan pa nan bai dilanti, por ehèmpel ora ta trata di empleo i formashon.

‘E mester ta pagabel, pues no spera palasio’
E studiantenan ta traha dieskuater siman na e proyekto i nan ke bini ku dos òf tres senario. Probablemente lo mester basha e bibiendanan improvisá ku tin aworakí abou. Jefta van der Elst, kende ta un dosente pa konstrukshon i ingeneria sivil no ta mira otro posibilidat. Mester bini ku algu otro na lugá di loke tin te ku awor. “E alternativa pa e habitantenan mester ta pagabel si, pues no spera palasio”, e ta bisa.

E studiantenan ta basa nan mes riba e normanan ku e konstruidó di bibienda sosial, Fundashon Kas Popular, ta traha kuné pa konstrukshon di kas. Pa un resultado habitabel, e plannan ta inkluí áreanan bèrdè i desagwe di awaseru i di awa sushi.

Buska ayudo di instansianan
Fundashon Swaen i Bisindario ke bati na porta di instansianan gubernamental ku e plannan. Segun e fundashon e konklushonnan di e enkuesta, ta ‘primi e outoridatnan su nanishi riba e pruebanan ku Zwaan no ta habitabel’.