KRALENDIJK – “Tur dia mi ta mira hende ku no tin kuminda, ku ta sobreviví dia ‘den dia ‘fo.” Segun sekretario di estado di Relashonnan den Reino Raymond Knops e habitantenan di Boneiru, Sint Eustatius i Saba ta ‘masha kontentu’ ku e manera ku gobièrnu ta hèndel pobresa na e munisipionan ekstraordinario aki. Den kayanan di Boneiru ta manera e hendenan ta pensa diferente tokante esaki.
Banda di e echo ku kos ta relativamente karu na Boneiru, salarionan tambe por ta abou. “Mi konosé hende ku ta manda nan yu skol sin ku el a kome. Tin bia mi yu ta parti su kuminda ku otro mucha den klas pa asina nan tambe haña di kome”, un hòmber riba e lugá di parker di un supermerkado lokal ta bisa.
Bonerianonan den kòmbersashon ku Ronald A. Muyden
‘Muchu poko poko’
Segun su mes palabranan e hòmber ta ‘relativamente bon pará’. Pero mésora e ta bisa tambe ku e no ta kontentu. Ta su opinion ku tur kos ta bai poko poko den kombatimentu di pobresa na Boneiru. E ta kue djap den banda komo shafùr di bùs di turista. “Ora no tin barku aden tin bia mi mester fia sèn pa mi lora.”
P’esei e boneriano ta haña ku e ponensia di Knops no ta klòp. Pasobra loke e mes ta mira òf pasa aden ta nèt kontrali. “Nan (gobièrnu na Den Haag, red.) ta mira e kos segun ta kumbiní nan.”
Nivel di pobresa
E Instituto Nashonal di Informashon di Bùdjèt (Nibud, Nationaal Instituuut voor Budgetvoorlichting) na 2014 ta konfirmá ku sifra, ku bonerianonan ta biba leu bou di e nivel di pobresa.
‘Tur dia mi ta mira hende sin kuminda’
Un hòmber di mas o ménos kuarenta aña ta sali for di e supermerkado kana bai su baiskel. Tres aña pasá el a bini for di Hulanda bin biba na Boneiru i ‘tur dia e ta eksperensiá pobresa’. Den e tres añanan ku e ta biba aki e no ta mira kambio. E ta puntra su mes ta unda e sekretario di estado a saka e informashon ku e hendenan ta “masha kontentu” ku e trato di kombatimentu di pobresa. “Tur dia mi ta mira hende sin kuminda, ku ta sobreviví di un dia pa otro. Mi ta yuda un òf dos persona si pero djei a kaba.”
Mayor soltero sin trabou
Un mayor soltero ku dos yu na Boneiru – ku ta bini na remarke pa ònderstant – segun e Besluit onderstand BES por haña serka e unidat SWZ di RCN un suma básiko di $152,- , un pago adishonal di $22,- pa biba independientemente i eventualmente un suma adishonal di $54,- pa un bibienda konhuntu, $27,- na kompensashon pa yu pa e promé yu i $14,- pa e di dos yu. Banda di esaki tin un pago adishonal pa esnan ku ta kompletamente i permanentemente kapas pa traha di $101,-.