DEN HAAG – Gobièrnu hulandes atrobe ta haña dos aña di tempu pa determiná kuantu plaka un hende mester minimalmente pa por biba den e munisipionan karibense. Esaki ta kousa hopi iritashon i inkomprenshon na e islanan.
‘No por splika’, Nina den Heyer (MPB), èks-diputado di Boneiru ta haña. Serka e gabinete anterior kaba el a insistí. Segun e èks diputado aktualmente e kredibilidat di polítika na Den Haag ta na riesgo.
“Si bo no sa ni mes kiko ta e mínimo ku bo mester pa biba di dje, kon bo por determiná altura di e kompensashonnan sosial i suèldo mínimo?”
‘Trato no igual’
‘Inkomprendibel’, èks diputado Koos Sneek (DP) di Sint Eustatius tambe ta haña. “Tanten na no determiná e mínimo sosial ei, hende lo tin e sintimentu ku nan no ta haña trato igual.”
Gobièrnu Hulandes, no opstante e medidanan anunsiá kontra pobresa, ta haña hopi krítika tambe di e mandatarionan aktual na Boneiru i Saba. Defensor di Pueblo nashonal i Kolegio pa Derecho Humano anteriormente a ekspresá na prekupashon.
Moshon no ta haña mayoria
Un moshon di SP i GroenLinks pa a base di rapòrtnan di investigashon eksistente determiná un mínimo sosial lihé, djamars no a haña un mayoria. “Mi a spera ku por lo ménos un di e partidonan di koalishon lo a kue un kurashi”, segun Den Heyer.
Den Heyer ta papia di e ‘di tantu strategia di retraso’ i ta bisa ku e partidonan di koalishon CDA, D66 i ChristenUnie a dobla bou di preshon di VVD. “Mi ta haña desapuntante ku un pais ku ta karga derecho humano i di mucha asina haltu, tòg ta skohe pa no guli e pulchi marga polítikamente sensitivo aki.
“E gabinete aki tin eksperensha kaba den tumamentu di desishon impopular. Pensa riba e impuesto di dividènt. Miares! E ora ei solushonamentu di pobresa den e munisipio ekstraordinario ainda ta un meta noble”, Den Heyer ta bisa.
Den Haag mester hasi lihé
Sneek ta haña difísil ku ta nèt e partido di koalishon CDA, di kua e ta miembro, no ta hasi lihé ku e mínimo sosial. Mi mester splika e habitantenan pakiko atrobe no a estables’é.”
E èks diputado siman pasa ainda tabata na Den Haag pa papia ku parlamentario tokante e situashon na Sint Eustatius. Sneek (DP) tambe ta prekupá si tin sosten na su isla pa polítika di Den Haag. “Hende ta haña ku e kos a kuminsá dura muchu largu.
P’esei Den Haag mester hasi lihé pa yuda proyekto grandi i ekonomia na Statia, Sneek (DP) ta avisá. E ta boga pa hasi koriente, awa, internet, telefon, i transpòrt mas barata. “Esaki ta e kosnan ku komo gobièrnu bo tin kòntròl riba nan.’
