ORANJESTAD – Hulanda no ta rekonosé lider di oposishon Juan Guaido komo e presidente interino nobo, manera Estádos Unídos i hopi otro pais den e region si ta hasi. “Ku esaki nos ta sigui Union Oropeo shen porshento”, e sekretario di estado Raymond Knops di Relashonnan den Reino, ku ta na Aruba algun dia, ta bisa.
Esei ke men ku ainda tin liña ku e gobièrnu di Nicolas Maduro. “Tin kontakto ku nan tur dos” (ke men ku Guiado tambe, red.), segun Knops. Tokante e situashon na e pais Suramerikano e ta bisa ku ta ‘difísil pa balorá kiko ta bai sosodé awor’. Meskos ku Union Oropeo Hulanda tambe ta pidi pa mantené trankilidat i no usa violensia. I pa elekshonnan liber.
En todo kaso no t’asina ku por ehèmpel Hulanda lo yama su embahador i otro diplomátiko bèk for di Venezuela. Maduro a kore ku e diplomátikonan merikano despues ku Estádos Unídos a rekonosé Guaido. Pero Oropa no ta rekonos’é i Rusia a deklará sosten na Maduro.
No tin trupa èkstra ta bai área karibense
Hulanda no ta konsiderá e situashon asina peligroso ku Defensa ta manda trupa èkstra pa protehá frontera di e islanan hulandes karibense. “Nos ta vigilá e situashon ku masha atenshon”, segun e bosero.
Ki ora sí tin mester di trupa èkstra, Defensa no ke antisipá ainda.”Nos ta vigilá i a base di esei nos ta disidí kiko posiblemente nos lo bai hasi diferente
Tantu na Kòrsou komo na Aruba djárason pasá venesolano a subi kaya pa deklará sosten pa Guaido.