WILLEMSTAD – Legislashon masha bieu. Falta di hende pa traha i ekspertisa. Dos di e sinku inspektornan ta sintá na kas. I komo último: un inspektor-general nobo ku ta kabes kaba di e departamento pa maneho di salubridat. Òf mihó bisá, e mester kontrolá su mes. No ta ripará mashá di un inspekshon di salubridat independiente na Kòrsou.
Sirving Keli – potrèt: ministerio di GMN
Awor a nombra Sirving Keli komo inspektor-general suplente di e servisio di inspekshon di salubridat públiko. Esaki ora despues di un pèrdida di konfiansa ku minister a pone su predesesor Jan Huurman un banda.
‘Ta djis temporario’ – minister di Salubridat Suzy Camelia Römer
E minister kurasoleño di Salubridat, Medio Ambiente i Naturalesa , Suzy Camelia – Römer no ta haña ku e nombramentu di Keli ta afektá e independensia di e servisio di inspekshon.
No ta kontra e Lei di Inspekshon di Salubridat Públiko, segun e minister. E lei aki ta regla e independensia di supervishon.
Suzy Camelia-Römer – potrèt: Jacqueline Hooftman
Ke men Keli ta direktor di sektor salubridat na ministerio di GMN kaba, i enkargá ku supervishon di e maneho di minister. Konkretamente e mester pèrkurá pa un bon kuido di salubridat (kalidat) i e aksesibilidat di esaki.
“Ta djis temporario”, Camelia-Römer ta bisa di e ponementu huntu di e responsabilidatnan ei.
No ta étiko
Keli ta supervisá asuntunan veterinario tambe. Ke men e ta na altura e komportashon no étiko di e kabes di Servisio Veterinario Arnold Dwarkasing. E último aki den tempu di trabou ta manehá un kompania ku ta importá remedi pa bestia. E depósito ta keda dilanti Servisio Veterinario na e adrès di e práktika di veterinario na Parera. Un bode ta hasi e entreganan serka veterinario na e isla.
Minister Camelia Römer un aña i mei pasá a anunsiá ku e lo para aktividat komersial di ámtenar di su ministerio. Tòg Kunchi Medical Importers, kaminda banda di Dwarkasing e hefe anterior di Servisio Veterinario Olav de Haseth tambe ta akshonista, tin e monopolio di entre otro importashon for di Estádos Unídos di vakuna pa kachó.
Jan Huurman – Potrèt: Roelie van Beek
Mil baka
Un otro asuntu ta e kuenta di regla segun lei e trabou di veterinario. Inspektor Huurman ku a kore kuné, a indiká kaba ku pa motibu di esaki no ta posibel pa supervisá asuntunan veterinario i krio di bestia lokal.
Huurman ta papia ku krítika tokante e plannan di gabinete pa ‘offshore farming’, e usamentu di buraku den lei pa trese mil baka Kòrsou sin ku e supervishon ta bon regla. Minister Canelia-Römer ta un di esnan ku a firma pa e proyekto di baka. Pero e no ta kontestá pregunta tokante e peligernan pa salubridat públiko.
Na final e inspektor di salubridat públiko Gersji Rodiguez Pereira ya tin mas ku un aña sintá na kas, ku mantenshon di su salario. E minister ta nenga di splika ta kiko ta e motibu.
| Legislashon hopi bieu tambe ta stroba un bon inspekshon na Kòrsou. Asina e lei di kombatí enfermedat kontagioso ta di 1921. E lei di pestisida tin 30 aña kaba. Ta kontrolá remedi empaketá ku un lei di 1961. Ta deskribí pan i lechi den un lei di 1918. Pa keshi i manteka tin regla di 1932, pa limonada di 1958. |
