ORANJESTAD – E di dos fase pa start e e refineria di Aruba por lo pronto a para. E insiertitut na Venezuela i e sanshonnan merikano ku poko tempu pasá a bira mas skèrpi ta pone ku ta difísil pa eksplotadó Citgo Aruba haña finansiamentu, e doño, Refineria di Aruba, ta bisa.
Pero Aruba tabata sa ora el a tuma Citgo Aruba komo eksplotadó nobo di e refineria, ku lo a bini problema. Pa motibu di Citgo su empresa mama venesolano PdVSA i e situashon polítiko den e pais di prosedensia. P’esei no tabata un sorpresa grandi ku por ehèmpel Estádos Unídos a kuminsá pone sanshon.
Riba 28 di yanüari a eksaserbá e sanshonnan atrobe pa PdVSA. Pasobra Estádos Unídos no ke pa e ganashi di Citgo disparsé den saku di gobièrnu-Maduro. Nan mester bai pa e presidente interino ku sosten Juan Guaido. P’esei tur loke ku Citgo gana mester pone riba un kuenta blòkiá. I esaki ta toka Citgo Aruba tambe.
Direktor di Refineria di Aruba Alvin Koolman ta bisa ku promé minister arubano lo trata di hasi tur loke e por pa konvensé e merikanonan ku no tin plaka ta bai PdVSA mas. For di fin di yanüari no tin niun kontakto mas ku e hendenan di PdVSA ku Maduro a pone na Aruba i e último di nan lo bai Venezuela bèk e luna aki,
Aktualmente tin 300 hende ta traha na e refineria, mitar di nan den servisio i sobra a base di kòntrakt. Ta espesialmente e kuater kompanianan kontratista ku ta sufri bou di e sanshonnan i e paramentu di plaka, Koolman ta bisa. Nan trahadónan ta haña nan fòrsá di keda kas.
Wèlga sin struktura
Sindikato IOUWA (Independent Oil Workers Union of Aruba) e siman aki a menasá di pone trabou abou pa motibu di falta di komunikashon tokante e situashon den e refineria, tambe for di gobièrnu. Un wèlga asina lo tin konsekuensia pa avion tambe pasobra lo no suministra kombustibel e ora ei, segun e sindikato.
Koolman ta bisa ku e yamada ei ta ‘iresponsabel’ pasobra sigur no ta asina ku un wèlga asina lo para tur kos na Aruba. “Un wèlga desorganisá ta peligroso tambe, espesialmente awor ku mester di finansiamentu pa laga e di dos fase sigui.”
‘Ta p’esei Kòrsou a rekonosé Guaido komo presidente interino promé ku Hulanda’ – Alvin Koolman, direktor di Refineria Aruba
Na mart lo sali na kla kuantu e di dos fase mester kosta i kuantu personal ta nesesario p’e. Ta e intenshon pa na 2020 e refineria habri atrobe komo upgrader di zeta krudo venesolano. I Koolman no ta duda esaki, no opstante e insiertitut aktual.
“Venezuela mester di Aruba pa realisá su plannan di zeta i gas.” Esaki ta konta pa Kòrsou tambe, e ta bisa. “Pesei bo a mira tambe ku e promé minister di Kòrsou a rekonosé Guaido komo presidente interino promé ku Hulanda. Pa motibu di e interesnan di e refineria aya.”