ORANJESTAD – Aruba ta bai pèrkurá pa mas dosente di su mes pa solushoná e skarsedat. “Hulanda mes tin un skarsedat masha grandi di dosente, ke men nos no ta bai buska nan aya mas”, segun minister di enseñansa Rudy Lampe.
E ministernan di enseñansa di Hulanda, Aruba, Kòrsou i Sint Maarten a topa poko tempu pasá. Den e enkuentro di kuater pais aki, a será mas protokòl pa koperashon mutuo. Unu ku ta importante tin di hasi ku e kambionan na skol preparatorio arubano e aña di skol binidero: lo no duna lès mas na hulandes sino na papiamentu.
Finalmente Aruba lo introdusí esaki na skolnan básiko tambe, e minister ta splika. Lo duna hulandes solamente komo idioma strañero. Kòrsou ta kana dilanti ku esaki kaba, p’esei lo bini mas koperashon entre e islanan aki.
‘Nos ta bai wak tambe si ta posibel pa tene èksamen final na ingles’ – minister di enseñansa Rudy Lampe
“Pa enseñansa sekundario nos a palabrá ku e otro paisnan ku nos ta bai wak si por laga hasi e eksámennan final na ingles.” E minister ta bisa ku ku esaki nan ke djòin e desaroyo ku mas i mas universidat, na Hulanda tambe, ta duna lès na ingles.
“Bo ta mira ku e idioma di enseñansa mundial ku ántes tabata latin, awor ta bira ingles.”
Esaki ke men ku alumnonan na enseñansa sekundario aworó por bai haña lès na ingles.