ORANJESTAD – Paul Croes, minister di labor den e gabinete anterior Eman II, mester bai será kuater aña pa korupshon na gran eskala ku dispensashon di labor (kaso Ibis). E ta apelá. Si gobièrnu lo entamá un kaso pa kobra e gastu, promé minister Evelyn Wever-Croes no por bisa ainda.
E veredikto awe meinta tabata un ‘sorpresa grandi’ pa Croes. “Ni hende ku kometé fornikashon ku mucha no ta haña un kastigu asina haltu.” Anto: ‘Kiko m’a hasi – pidi donashon pa un konsierto di Pasku, kaha di serbes pa evento polítiko – tur polítiko ta hasi esaki den tempu di elekshon na Aruba.” Wes no ta pèrmití Croes di tin un puesto polítiko mas tampoko pa 9 aña.
Ministerio Públiko a pidi sinku aña pa e ‘fábrika di dispensashon’ ku espesialmente Croes ku su sekretaria, shafùr i rebendedónan tabata probechá di dje. Tambe Croes tabata probechá di e donashonnan na su fundashon ku tabatin komo meta pa finansiá su kampaña polítiko. Pero un parti di e plaka (shen mil florin) el a usa pa entre otro kumpra hoya i paga su debenan di estudio i credit card.
‘Soborno no ta normal, tampoko den un komunidat chikí manera Aruba – wes den kaso Ibis
Wes pa un gran parti ta di akuerdo ku loke a eksigí i ta haña ku a prueba tur echo kastigabel ku eksepshon di algun punto. ‘Korupshon ta inaseptabel i kastigabel, i soborno no ta normal, tampoko den un komunidat chikí manera Aruba”, asina wes a bisa, tambe di un kantidat grandi di empresario ku a haña kastigu pa soborno aktivo. Mayoria di nan a haña un but di 5000 florin, di kua mitar provishonal.
Wes ta hasi un distinshon si; un grupo a soborná e minister aktivamente pa asina haña dispensashon pa por tuma personal strañero pa trabou. Nan a skohe pa no tuma arubano den servisio, no opstante e maneho di gobièrnu. pero tin un grupo tambe, espesialmente doño chines di supermerkado ku e minister i su kompañeronan tabata buta bou di hopi preshon. “Aki kasi bo por papia di ekstorshon”, segun wes.
Investigashon interno: a kita ámtenar for di trabou
Croes komo minister tabata malusá su funshon tambe dunando ámtenar instrukshon ilegal. Manera na inspektor di labor pa no tene kòntròl di kompania serka por ehèmpel restorant 297 i Harmony Supermarket.
Banda di e kaso penal gobièrnu a hasi un investigashon interno tambe. A skòrs òf kita ámtenar, promé minister Wever-Croes ta bisa. Espesialmente den e departamento di labor di labor kaminda mester a pidi e dispensashonnan. Pero ta ei tambe tin e denunsiantenan ku tambe a pone e kaso di korupshon aki kore. Wever-Croes no sa ainda si e lo kuminsá un kaso sivil pa kobra e daño serka e minister.