DEN HAAG – Habitante di Boneiru, Saba i Sint Eustatius pa promé bia por vota pa Eerste Kamer, pero tantu na e islanan komo na Den Haag no por ripará muchu interes.
Dia 20 di mart na Hulanda oropeo e habitantenan atrobe ta skohe nan Miembronan di Staten Provinsial i indirektamente tambe nan Eerste Kamer. Na Boneiru i Saba tin elekshon di Konseho Insular. I banda di esaki huntu ku Sint Eustatius e islanan ta vota pa Eerste Kamer.
Tiki atenshon pa e islanan
E diferente partidonan polítiko na Den Haag a traha un programa di elekshon pa kasi kada provinsia, pero no pa e tres munisipionan ekstraordinario ku pa promé bia por vota tambe. Pakiko? Partido 50Plus ta e úniko ku a duna un reakshon ora a puntra.
“Mi ta haña e pregunta aki grasioso si”, e bosero di 50Plus ta bisa. “Komo periodista ku 45 aña di eksperensia mi ta mira un bunita titular: Partidonan no ta hasi nada ku islanan karibense. Den nos programa di partido tin dos alinia tokante Karibe, pero no ta muchu kos.”
“Awor e pregunta ta: kua partido ta traha mas tantu pa e islanan? Serka 50plus nos lo reakshoná riba insidente mas parti. Por ehèmpel e ayudo di emergensia pa Sint Maarten, kombatimentu di korupshon na Sint Eustatius i ayudo pa Venezuela.”
Vota pa ken?
No tin un programa di elekshon spesial pa e islanan antó. Es ku ke sa kiko e partidonan hulandes ke pa e islanan karibense polítikamente, riba e website di e partidonan polítiko mester buska e titular ‘BES-eilanden’.
D66 ta bai Boneiru
E siman aki parlamento hulandes tin un siman liber, ke men no tin reunion. Parlamentario di Tweede Kamer Antje Diertens di D66 ta kombiná su biahe anual privá pa Kòrsou ku un dia di kampaña na Boneiru.
Segun Diertens e no tei pa buska voto pa D66 pa Eerste Kamer, pero pa mobilisá mas tantu boneriano posibel pa bai vota. “Mi tin masha gana di mustra ku D66 ke e islanan bon.”
Tur voto na Sint Eustatius ta pa CDA
Boneiru, Saba i Sint Eustatius no ta kai bou di un provinsia, pero diréktamente bou di gobièrnu hulandes. Habitantenan ta vota pa Eerste Kamer via kandidatonan lokal pa un asina yamá kolegio di vota. Es ku nan elegí, por vota na mei pa disidí Eerste Kamer.
Pasobra gobièrnu hulandes a tuma ofer gobièrnu di Sint Eustatius temporariamente a posponé e elekshonnan di 20 di mart. Na e isla ei ta e partido lokal DP di Koos Sneek so a trese kandidato pa e kolegio di vota di Eerste Kamer. P’esei CDA ta kasi sigurá di tur voto via e partido ruman ei na Statia.
Den Eerste Kamer por gana 75 asiento. E tres islanan huntu por haña 0,11 asiento (Boneiru 0,09 asiento, Saba 0,02 asiento i Sint Eustatius tambe 0,01 asiento).
