SANTO DOMINGO – “Na edat di 14 aña mi tata a duna mi mariwana pasobra mi tabatin tristesa di amor. E ta yuda bo depreshon na e momento ei, ma bo mester keda huma pa bo sigui sinti bo bon. El a duna mi skitsofrenia.”
Uso di mariwana na Aruba hopi bia ta algu sosial. Pero pa e adiktonan Juandrick Ahrendsz i Sean* el a resultá den un adikshon di droga pisá.
Un di e problemanan ta ku Aruba tin un standart di bida mas haltu ku mayoria di pais karibense i pa motibu di turismo semper tin fiesta un kaminda. Sean: “Tur kaminda tin droga, no tin nada ta stòp bo i bida ta dushi. Mi ta traha den hóreka i ei por kumpra tur kos. Despues di mi warda mi ker a fiesta. Semper mi tabata haltu. Mi tabata bende ku turista, pa sinku bia e preis di kompra ke men e ora ei mi mes tambe por a kumpra.”
Sean a bai di mariwana pa xtc i kokaina. El a sali pa Sürnam pa kambia su bida, i esei a logra te ora ku el a bai biba serka su tata adikto. El a siña Sean konosé crack. “For di e dia ei tur kos a bai malu. M’a pèrdè tur kos, ta crack so mi tabata ke.”
‘Mi a bai rehabilitashon sinku bia na Aruba’-Juandrick Ahrendsz
Fundashon Adopt an Addict ta yuda hende ku adikshon pa bai un rehab, mayoria bia na Repúblika Dominicana na Hogar Crea. Serka e organisashon aki di 155 rònt mundu, no ta trata solamente di detoksiká manera na e klínikanan na Aruba. Ta forma e adiktonan tambe. Pa asina nan por partisipá atrobe na komunidat.
Sean* i Juandrick na Hogar Crea San Cristobal – potrèt Linda Reijnders
“Na Aruba mi a bai rehabilitashon sinku bia. Pero mi a keda ku problema pasobra a kùr mi af”, Ahrendsz ta bisa. El a haña ònderstant pero esaki no tabata sufisiente pa e mantené su mes. Na Hogar Crea awor Ahrendsz ta sigui un programa pa ‘re-edukashon’.
Hopi rekaida
Tòg 60% di e adiktonan ta haña rekaida. Bèk den nan sirkunstanshanan bieu ku amigu i famia e problemátika bieu i kustumbernan bieu ta bini bèk. Ta p’esei mester di ‘kordinashon sentral for di gobièrnu, koperashon entre organisashonnan di ayudo, i mas profeshonal’, Adopt an Addict ta bisa.
Tambe nan ke pa rekonosé adikshon komo un enfermedat pa asina e seguro nashonal AZV por duna kompensashon. I ku un tratamentu den eksterior no ta nifiká mésora ku bo no ta inskribí mas na Aruba loke ta pone e adiktonan pèrdè nan derechonan. Pasobra esei ta e kaso aktualmente.
Kontra plannan di kánabis di gobièrnu
Ke men no tin un infrastruktura sosial asina ekstenso. I esaki ta prekupá e fundashon i otro hende den ayudo sosial nèt awor ku gobièrnu tin plan pa legalisá kánabis medisinal. I tambe di kultivá mariwana pa eksportashon.
Ademas manager Osiris Frias di Adopt an Addict último tempu ta mira un oumento di hóben adiktá, asta püber, ku ta bin pidi ayudo. Kasi semper nan adikshon a kuminsá ku mariwana, ta su eksperensia. P’esei e no ta positivo tokante e plannan di gobièrnu. “Ora usa hopi mariwana e ta afektá bo selebre, bo no ta funshoná normal. Mariwana sigur sigur ta e kaminda pa bai usa otro droga.”
*E nòmber di Sean den e artíkulo aki ta fiktisio. Su nòmber mes ta konosí serka redakshon.