HILVERSUM – Un i te asta tres djòp aseka banda di bo estudio fulltime? Pa hopi studiante karibense na Hulanda esaki ta realidat. Kontrali na hopi studiante hulandes nan no por spar plaka pasobra nan por keda biba na kas.

Eliminashon di bùrs básiko na 2015, un preshon di estudio muchu haltu, pero tambe e skarsedat di kas pa biba i moda di biba segun CBS ta e motibunan pakiko studiante ta keda biba na kas mas tantu. Pero pa studiante karibense na Hulanda esaki no ta un opshon. P’esei hopi di nan ta haña nan fòrsá di traha banda di nan estudio.

E situashon aki ta konta tambe pa Edrieënna Brandao (24) di Sint Eustatius. Banda di su estudio HBO pa dosente na Hulanda e ta traha 16 pa 20 ora komo dosente di beilès i den un pakus.

‘Mi ta mira hopi otro studiante ku ta lucha ku keho di stress’ – Studiante Edrieënna Brandao

“Mi a buska informashon for di trempan i mi tabata sa ku ta mil euro di finansiamentu di estudio so mi lo a haña. Si e ora ei bo mester paga hür i bo gastunan fiho, bon mirá bo no ta sobra nada mas”, Edrieënna ta splika.

E no tin strès pa motibu di su situashon finansiero, pero rònt di dje si e ta mira otro studiante karibense ku ta lucha ku keho di strès. P’esei e ta konsehá studiante nobo di e islanan spar promé ku nan bini Hulanda. “Sòru a promé bo sa sigur kua estudio ta pas serka bo, i despues buska un djòp aseka ku bo gusta, pero sigur spar algu delantá promé ku bo bini aki banda.”

Gastu di estudio na Hulanda
  • Hür: 417 euro
  • Kompra: 181 euro
  • Buki i material pa studia: 58 euro
  • Plaka di kòlezje: 172 euro
  • Transpòrt (banda di karchi OV): 63 euro
  • Rekreashon, sali i deporte: 146 euro
  • Paña i sapatu: 47 euro
  • Seguro médiko: 106 euro
  • Telefon: 26 euro
Listema di fia via DUO
  • Beeka adishonal: te 378,22
  • Fiansa: te 474,91 euro
  • Kredit di sèn di college: 162,58
  • Fuente: Nibud

    Moira Goeman (25) di Kòrsou banda di su estudio ta traha tambe: 25 ora pa siman. Esaki ta bai bon pasobra e ta serka di kaba di studia i e tin mas ‘tempu liber’. Pero no muchu tempu pasá esaki tabata kompletamente diferente. “Mi tabata kore stazje 40 ora pa siman i banda di esaki mi tabatin un djòp aseka di un promedio di 15 ora. Mi tabata haña difísil pa indiká ku esaki tabata bira di mas. Na Kòrsou tabata mas tantu gana plaka èkstra, na Hulanda esaki ta nesesario tambe pa biba di dje.”

    Moira ke protehá otro studiante kontra di e sintimentu aki. Esaki e ta hasi serka e ret di studiante Association of Dutch Caribbean Students. Komo presidente e ta duna studiante tep pa djòp aseka i pa estudio. “Bisa ora bo no ke un kos. Ta OK pa tin mester di sosiegu tambe i pa ke hasi kos agradabel tambe.

    Pero ta nèt pa hasi kos agradabel banda di bo estudio hopi bia mester di sèn. Rynell Offerman (25) di Kòrsou a siña esaki masha lihé durante su estudio na Hulanda. “Despues di un aña mi a kuminsá ku un djòp aseka komo bendedó den un pakus di paña. Mi a hasié pa keda aktivo sosialmente, pero tambe pa por paga tur kos.”

    Pero ei e kos no a kaba pa Rynell. Banda di e djòp aseka aki e ta traha tambe komo instruktor di fitness. “Ku e mil euro di finansiamentu di estudio ku bo ta risibí, bo no ta sobra muchu despues ku bo a paga tur bo resibunan.” Entretantu Rynell a kaba di studia i su djòp aseka komo instruktor di fitness a bira un trabou fulltime.