SAN NICOLAS – “Mi ta sinti cu gobierno y e instancianan a pensa cu nos no lo sigui cu e caso. Pero nos ta keda lucha te ora nos lo haya nos derecho.”
Asina Joyce De Vries-Nassy ta comenta. E habitante na Lago Heights hunto cu su casa Jaap a gana un caso importante den casi tres aña di lucha contra e dump di asbest cerca di nan cas. Hues a dicta cu gobierno no por conclui cu e dump aki no ta creando un situacion peligroso pa e bario pega na e tereno.
Durante inspeccionnan anterior, entre otro aña pasa bou Ministerio Publico su ordo, a sali afo cu tin asbest ainda cu no ta tapa. E conclusion tabata cu mester investiga esaki mas pronto posibel, pero te awe a keda gobierno sin hacie.
Gobierno a faya di controla
Ademas gobierno mester a monitor e otro asbest cual nan a dera na 2016, despues cu esaki tabata warda den 55 container habri pa añanan largo. Tampoco gobierno a cumpli cu esaki.
Ta trata di 4000 metro cubico di material conteniendo asbest cual ta warda den mas saconan paketa bou tera. Departamento di Naturalesa y Medio Ambiente (DNM) mes a indica cu mester haci inspecionnan cada mey aña y sigur despues di cada temporada di awacero, pa asina controla si corosion a tuma luga.
Nan no a duna niun motibo pa keda sin haci e trabou di inspecciona aki. Awor cu hues ta haya cu gobierno a faya den esaki, minister di Husticia Andin Bikker ta reacciona cu e inspeccionnan lo tuma luga mas pronto posibel.
Permiso ta valido, hues a dicta
Riba e pregunta dicon gobierno ta lucha contra e habitantenan en bes di proteha nan, Bikker ta contesta: “E caso aki ta di prome mi tempo (como minister, red.). Mi ta bay delibera cu e departamentonan envolvi kico mester haci. DMN ta cay bou di mi colega (minister di medio ambiente, Otmar Oduber, red.).”
Minister Bikker ta encarga cu e ley concerni (Hinderverordening) y e ta bisa cu e permiso duna na refineria no ta valido mas como cu e planta a cera. E argumento aki ta uno cual gobierno ta uzando pa hopi aña caba contra e habitantenan pa keda sin actua contra e molester. Sinembargo, awor hues a caba cu e argumento aki tambe, indicando cu e permiso ta valido ainda y cu gobierno mester actua.
E pareha Nassy-De Vries ta prefera cu e dump nunca lo a bin. Nan tambe ta keda para riba e punto cu e dump ta ilegal. Y nan kier cu gobierno lo revoca e permiso di refineria y sanea e area di dump completo.
‘Gobierno a caba cu nos derecho pa biba na un luga safe’- Jaap de Vries, habitante Lago Heights
“Gobierno ta responsabel”, Jaap ta bisa, “pasobra nan a caba cu nos derecho di biba na un luga safe.” Banda di esaki e pareha a denuncia e doño anterior di refineria tambe, esta Valero. E pareha a caba di gana un otro caso tambe pa asina por pone man riba e convenio secreto firma entre gobierno y Valero e tempo di traspaso di e refineria.
Ni parlamento a logra di obtene e documento ora e deal a pasa den parlemento pa aprobacion. Mientras e consecuencianan implica for di e deal aki pa comunidad, ta grandi.
Ministerio Publico tambe a uza e convenio secreto aki exitosamente contra e habitantenan ora nan a entama un caso pa asina purba por medio di e caminda penal logra un solucion pa e situacion peligroso. A basa di e documento aki Ministerio Publico a convenci Hof di Husticia cu gobierno a aproba e dumpmento di asbest. Asina gobierno e tempo ey a caba cu ley local y tambe e derechonan di ciudadanonan sin cu nan sa.