ORANJESTAD – Protesta di docentenan contra e plannan di innovacion di minister di enseñansa Rud Lampe (RED) ta creciendo. Pa di dos biaha den tempo cortico nan a subi caya y e biaha aki cu mas hende (alrededor di 100 hende). Punto principal: minister no ta scucha nan.
reportahe di Sharina Henriquez
E grupo bisti den T-shirtnan cu e lema ‘Enseñanza bao atake!!!’ ta lidera pa sindicatonan Simar y Seppa. Nan ta marcha direccion di parlamento y Bestuurskantoor pa entrega un peticion hunto cu un mocion di desconfiansa contra e minister. Nan ta haya cu e mandatario no ta scucha e docentenan y asina kier imponi su plannan di innovacion riba nan.
“Nos tambe ta spera cu nan lo no bin cu e cambionan den vakantie ora niun hende t’ey”, e lider sindical di Simar, Josephine Albertus ta bisa. Sino mas accion lo sigui, e ta sigura.
Minister di enseñansa no tabata presente. Su colega minister Otmar Oduber ta tuma e peticion y otro puntonan di parti di prome minister cu no ta na Aruba. E ta priminti cu e carta ta riba agenda di e prome conseho di minister diamars proximo. “Gobierno tin oido pe problemanan den enseñansa. Tambe pa esun di e centro multidisciplinario.”
Muchanan special
Minister di enseñansa kier cera e seccion di observacion di e centro aki, asina Nanoek Richardson, docente didatica ta splica. Un mal idea como cu e ta e unico luga pa muchanan cu tin problema. “Nan ta muchanan cu no por participa den enseñansa regular. Como cu tin klasnan grandi tambe. Nan ta mucha por ehempel cu no por papia. Nos ta duna nan guia extra pa asina nan por haya mas confiansa.”
E klas special ya ta chikito cu luga pa ocho mucha so. Tin un lista di speransa. Pero si minister lo sigui cu su plan, nan mester bay bek den klas ‘normal’. “Esaki lo tin consecuencianan grandi pa hopi mucha”, Richardson ta conclui.