DEN HAAG – Conseho di Minister di Reino tin hopi preocupacion riba e plan di Aruba pa kita poder di Den Haag pa por supervisa Aruba su finansa publico.
Parlamento di Aruba ‘a mata e supervision’ – locual e Conseho di Minister di Reino tin por medio di e colegio di supervision financiero di Aruba (CAft)- ora di aproba un amienda luna pasa. “Esaki nos no ta haya aceptabel. Pa motibo di esey nos lo hiba un combersacion riba esaki”, asina secretario di asunto di reino Hulandes, Raymond Knops ta bisa.
E directiva cual CAft tambe a recomenda recientemente por lo pronto no sigui. Esaki tambe a resulta despues di e reunion den e Conseho riba diabierna 5 di juli.
Di otro banda e ley nobo di supervision financiero di Aruba mester pasa gobernador ainda pa aprobacion. Pero asina leu e asunto lo no yega, segun Knops. “E gobernador sa cu tin un discusion ariba e ley aki andando den Conseho di Minister di Reino. Pues asina e lo no firma e ley.”
Siman proximo lo tin e ultimo oportunidad pa e ministernan Hulandes y e representantenan di gobiernonan Caribense por reuni prome di e receso. Pero Knops ta haya cu despues e receso e situacion por sali riba agenda di e Conseho di Minister di Reino.
Sin welga di hamber
Prome minister di Aruba a bula pa Den Haag specialmente pa atende e reunion di e Conseho como cu e preocupacionnan e mes kier ta presente pa aclaria e asuntonan. Esey a yuda segun prome minister Evelyn Wever-Croes pa trece trankilidad bek den e relacion cu Hulanda. Cual ta un impresion diferente cu Knops a laga atras despues e reunion.
Wever-Croes ta bisa cu e Conseho a aprecia cu el a bula bin y no bay den un welga di hamber. Asina el a tira palabra bek na su oponente politico Mike Eman kende si a drenta den un welga di hamber na 2014 ora Aruba tambe tabata bringa cu Hulanda riba e finansa publico. Wever-Croes ta bisa cu gobierno di Aruba awor ta sigui traha riba su plannan pa drecha su finansa y regla e supervision.
Con Hulanda y Aruba lo yega na otro riba e parti di supervision, ainda ta keda insigur.