ORANJESTAD – Parlamentario Sue-Ann Ras (MEP) a tuma su retiro. Motibo ta e noticia di Ret Karibense. E medio a hay’e riba Netflix durante IPKO, un reunion parlamentario importante.
Den un mensahe graba e ta admiti cu su comportacion tabata bergonsoso. No solamente pa su mes sino su famia y sostenedonan tambe cu a hinca nan confiansa den dje. E tambe ta bisa cu locual el a haci y e decision cu el a tuma na e momento ey, e no por keda sin tuma su responsabilidad. Ras ta bisa cu el a haci’e sin pensa y asina mester carga e consecuencianan awor y tuma su responsabilidad. For di su curason profundo e tambe kier pidi su disculpa.
Asina den un par di minuut su carera, unda el a yega despues di traha duro desde edad jong, ta destrui. E ta spera si cu esaki tambe ta un ‘wake-up call’ pa parlamentarionan con nan mester comporta den future ora nan a comete un eror.
Prome minister y lider di MEP, Evelyn Wever-Croes, ta bisa cu e partido ainda ta den deliberacon ken lo tuma over e asiento di Ras. E ta haya cu Ras a tuma e decision corecto unda ta mustra integridad cu pa hopi tempo no a mira den politica.
‘Ras no mester a tuma su retiro’ – Ady Thijsen, presidente di parlamento
Presidente di parlamento Ady Thijsen (MEP) kende tambe tabata e lider di e delegacion parlamentario durante e incidente na Eerste Kamer, ta acusa e periodista kende a trece e noticia di traha inetico. “E mester a bin cerca mi como cu ami tabata e lider di delegacion. Ami tabata responsabel.” Sinembargo Thijsen no ta haya cu e mes por a acerca e periodista despues e publicacion pa duna su comentario.
Ademas e no ta haya cu Ras mester a tuma su retiro.”Locual el a haci no tabata bon, sin duda. Pero su retiro no ta husto.” Noticianan manera esaki segun e, tin consecuencia grave pa parlamentarionan. “E presion riba e parlamentarionan ta bira grandi como hende lo uz’e tambe riba Facebook. Eora no ta Netflix e ta wak, sino porno, tur cos nan lo traha di dje. Bo ta pensa esey ta fair?” Pero Thijsen no ta sinti cu ta bale la pena pa bay tras di e hendenan cu ta bin cu noticia falso asina.