PHILIPSBURG – Aruba na sèptèmber ta spera di introdusí ESTA, un pèrmit di biahe elektróniko di antemano, pa Venezuela. Sint Maarten tambe ta interesá. Esaki a sali na kla durante e deliberashon kumbre entre e ministernan di hustisia di Aruba, Kòrsou, Sint Maarten i Hulanda, e siman aki na Sint Maarten.
E frontera ku Venezuela ta será for di mei. Na yüni Aruba a prolongá e seramentu di frontera ku tres luna i e ta terminá na sèptèmber. E ora ei isla lo trata di tin e ESTA (Electronic System for Travel Authorization) reglá.
Minister di Hustisia di Sint Maarten Cornelius de Weever ta bisa tokante esaki: “Nos ta bai investigá si nos tin base legal pa esaki i si nos por ehekutá ESTA pareu ku Aruba òf djis despues.”
Mehorá detenshon di imigrante ilegal na Kòrsou i Sint Maarten
De Weever ta bisa ademas ku a habri e sentro di detenshon pa imigrante ilegal na Simpson Bay atrobe. “Nos por pone trahadó traha ei awor, pèrkurá pa tin un médiko, ku tur kos t’ei pa pèrkurá pa e kos kore na un manera humano.”
Di robes pa drechi Ministernan Grapperhaus (Hulanda), Weever (Sint Maarten), Bikker (Aruba) i Girigorie (Kòrsou)
Na e deliberashon kumbre hudisial e migrashon for di Venezuela i vigilansia di frontera tabata haltu riba agènda. Hulanda a primintí 4.4 mion euro pa entre otro trein personal di polis di e kuater kuerponan di polis (inkluso esun di Hulanda Karibense) i wardakosta.