ORANJESTAD – Dos periodista, entre nan e reportero conoci Speed Andrade ta culpabel di horta aparatura di polis y di tapamento di comunicacion di polis. E polis envolvi Kenneth Rasmijn tambe a ricibi un castigo di trabou di 240 ora como el a horta un portofoon pa e periodistanan por uza.
Hues a duna Speed e castigo mas halto den e caso aki: banda di un castigo di trabou di 240 ora, e tambe a haya un castigo di prison condicional di 2 luna cu un tempo di prueba di 3 aña. “Pa asina preveni cu e lo comete echonan castigabel den futuro atrobe”, asina hues ta dicta.
Tapamento di comunicacion di polis confidencial y bendemento di e informacion aki ta un practico comun bou periodistanan riba e isla, asina a sali afo den e caso aki y tambe a base di combersacionnan cu periodista. Ministerio Publico tin un otro caso den preparacion como cu tin mas periodista culpabel di e practiconan aki, segun nan.
Keda pusha e limite
Speed y su colega Marko Espinoza, kende a haya un castigo di trabou di 180 ora, ta traha pa e fuente di noticia online 24ora.com. Ambos ta apela e sentencia, asina e dunado di trabou ta informa. Speed tambe a suministra su noticianan pa mayoria di e medionan riba e isla, manera e matutino Diario, planta di television nacional Telearuba, Canal 90 y Amigoe (desde aña pas no mas).
Periodista di Amigoe Ariën Rasmijn ta comenta cu pa motibo di presion halto como cu hopi hende kier sigui sucesonan riba caya, periodistanan lo keda pusha e limitenan pa obtene e informacion.
Speed no a presenta den corte pasobra e ta den exterior pa trabou, asina su abogado ta bisa. Espinoza y polis Rasmijn si a presenta pero nan no kier duna un comentario despues. Por ta mas laat, Espinoza ta bisa. Y polis Rasmijn kier warda con su caso di retiro lo anda prome.